Entre dos mundos lana helduko da bihar Amurrio Antzokira zaintza lanak, prekarietatea eta Atzerritarren Legea lantzeko, eta ez edonola. Izan ere, Getxon zaintza beharretan aritzen diren zortzi langilek osatutako Las de Afuera taldeak euren azalean bizitakoa islatuko dute.
Bederatzi emakumezkoak 35 eta 65 urte arteko adinekoak dira eta Abya Yalakoak. Horrek eta zaintza lanetan aritzeak antzeko esperientziak ekarri dizkiete: mesfidantza atzerritarrak izateagatik, zailtasunak etxebizitza duina lortzeko, oztopoak euren familiak batzeko, arazoak funtsezko eskubideak aldarrikatu dituztenean...
Bizipen horiek guztiak (matxismoa, arrazismoa, prekarietatea edota burokrazia) salatzeko sorkuntza prozesua abiatu zuten Erein Zapalduon Antzerkiaren Kolektiboarekin eta Cony Carranza Getxoko ahalduntze eskolako trebatzailearekin.
Feminismotik bideratu dute lana, antolakuntza sozialari, zaintzen banaketari eta herritar migratuen estereotipoei buruz hausnartzeko. Bihar taularatuko dute Amurrio Antzokian 20:00etan eta 5 euro balio du sarrerak.