Hiri-marka berria izango du aurrerantzean Amurriok, udalerriko "sentimendu kolektiboa" indartzeko. Amurrio eta ni lelopean Amurrio "bizitzeko, inbertitzeko, bisitatzeko eta negozioak egiteko leku erakargarri eta lehiakor gisa kokatzea da" markaren helburua, baita "udalerriaren nortasun bakarra eta lehiarako abantailak islatzea" ere.
🎨 "Amurrio eta ni" hiri-marka berria aurkeztu du gaur Amurrioko Udalak. Udalerriak" iraunkortasunarekin, garapen ekonomikoarekin eta gizarte-kohesioarekin duen konpromisoa" islatu nahi du irudi berriak
— Aiaraldea.eus (@aiaraldea) May 3, 2024
Informazio gehiago hemen 👇https://t.co/kTxodeS0DI pic.twitter.com/5OaSrGRLsU
Sormen prozesua
Gaur egin dute hiri-markaren aurkezpena; eta bertan parte hartu dute diseinuaren kontzeptualizazioaren atzean dagoen Zorraquino diseinu estrategikoko aholkularitzako kideek.
Angelica Berco azaldu ditu markaren sorrera prozesuaren nondik norakoak: "Workshop desberdinak egin ditugu Amurrioko elkarte eta profil oso anitzeko herritarrekin. Hasieratik genuen argi identitate-marka bat sortu nahi genuela, pertsonek haien burua bertan identifikatuta ikusiko zuten marka bat".
Zer da Amurrio? Galdera horri erantzuna bilatu nahian abiatu zuten prozesua Bercok eta Zorraquinoko gainerako kideek. "Elementu komun ugari topatu genituen galdera horren atzean —azaldu du Angelica Bercok—. Naturaren garrantzia, elkar zaintzeko kultura, gertutasuna... finean, Amurrio bizitzeko toki atsegina dela."
Ideia horiei guztiei forma emanda sortu zuten Amurrio eta ni hiri-marka. "Identitate freskoa da, tipografia oso adierazgarri eta kolore-gama bizigarriarekin; kontzeptu berriak eraikitzeko bidea irekitzen duena", nabarmendu du Zorraquinoko kideak.
"Alor instituzionala kendu nahi genion hiri-markari, herri guztiaren elementu izatea nahi dugu"
Inplementazioa herrian
Hiri-marka lurreratzea eta udalerrian inplementatzea da hurrengo urratsa. "Gure asmoa da herritarrek bere egitea Amurrio eta ni, eta identitate kolektiboa indartzeko elementu bezala baliatzea", azaldu du Txerra Molinuevo alkateak.
Azpimarratu dutenez, hiri-marka berria ez dator duela urte gutxi berritutako Udalaren marka-korporatiboa ordezkatzera, tokiko-erakundetik harago hedatu nahi dute. "Alor instituzionala kendu nahi genion hiri-markari, herri guztiaren elementu izatea nahi dugu", azpimarratu du Molinuevok.
Marka zabaltzeko lehenengo ekintza Amurrioko txoko desberdinetan egingo diren horma-irudi eta grafitiak izango dira. "Enplegu-plan bat dago udalerriko zenbait txokotan gai desberdinekin (kultura, kirola...) grafitiak egiteko, eta bertan hasiko gara Amurrio eta ni marka sartzen ere", adierazi du Txerra Molinuevok.