Apirilaren erdialdean abiatutako protestak amaitu dituzte Amurrioko Udaleko enpresa batzordeko sindikatuek, Udal Gobernu Taldeak negoziazio mahaia osatzea onartu du eta.
LAB, ELA eta ESAN sindikatuek, hortaz, ostiralero egiten zituzten kontzentrazioak bertan behera utzi dituzte. Elkarretaratzeen helburua bazen udal hitzarmenari lotutako negoziazioak hastea, baina langileen ordezkariek zabaldu zutenez, "alkateak uko egin zion komitearekin biltzeari eta negoziatzeari”.
Horrez gain, enpresa batzordeak salatu du Udal Gobernu Taldearen asmoa zela beharginen ordezkarien parte hartzea mugatzea: "Hasiera batean, Gobernu Taldeak Komiteko zenbait kidek negoziazioetan parte hartzeko eskubidea murrizteko ahaleginak egin arren, kide guztien partehartzea onartu du azkenean, legeak ezartzen duen bezala. Eskubide ukaezin bat zen".
Sindikatuek adierazi dute elkarrizketa eraikitzailea sortzeko prestutasuna dutela eta espero dutela beste aldeak jarrera bera izatea. Landuko dituzten gaien harira, LAB,ek, ELAk, eta ESANek mahai gainean jarriko dute belaunaldi-erreleborako Giza Baliabideen Plan Estrategikoa eta lan-baldintzak hobetzeko lanpostuen balorazioa.