Astearte honetan hasi da martxan Amurrioko Artzikirol eskola. Aiaraldeko kirolzaleak batu nahi dituen ekimenak, Artzikirola ezagutzeko aukera ematen dio edonori. Horrela, kirola ezagutzen dutenek, etorkizunean, Artzikirola erakusteko aukera izango dute jokoen laguntzaz. Ramon Rey dioen bezala, “Kirola jokoa da, denok parte hartu dezakegun jokoa”. Horrela, kirol berriaren sortzailea, edonork parte hartu dezakeela gogoratu du.
Baina, zer da Artzikirola? Errugbi, Eskubaloi eta Futbolaren arteko batasunetik jaio da Artzikirola, kirol horien baturaz kirolzale guztiei aukera berdinak ematen baitzaie. Artzikirolaren helburua, pertsona ezberdinek kirolean berdintasunez jokatzen gozatzea da, pertsonaren ezaugarri fisikoak kontuan hartu barik. Horrela, kirolaren sortzaileak adierazi du: “Artzikirolean aritzeko ez da beharrezkoa kirolean trebetasunik edukitzea”.
Ramon Reyk 30 urte daramatza Artziniegan, gehienbat ume eta gazteekin, kirola sustatzen. Urte hauetan, beste kirol batzuen artean, emakumeen Futbol eta Eskubaloiko taldeak entrenatu ditu. Horrela, Artzikirolean txertatu dituen kirol horien nolakotasunak aski ezagutzen ditu.
Artzikirolak lau urtez darama, astero, Artziniegako gazteak kirolarekin batzen. Denbora honetan, Aiaraldeko mugak gainditu ditu eta ezagutzera emanez Arabako ikastetxetatik, Bizkaia eta Nafarroatik pasata, Andaluziara salto egin du. Hedapen hori, gehienbat esparru publikoan ematen ari da, baina ez da klubetan sustatzea baztertzen.
Kirolarekin hitzordua, astearte arratsaldetan 18:00etatik aurrera Lucas Rey ikastetxean izango da.