Datuen garaian bizi gara. Dirudienez, hori da datorren urteetako “petrolioa”. Gizarte erabat komunikatu honetan datuak sortzen ditugu nonahi. Adituek diote, bi-hiru urtero munduan dauden datuak bikozten direla. Datuen produkzio ero honetan gaude gizakiok, sentsoreak, ordenagailuak, mugikorrak, eta abar erabiltzen modu askotan. Ezin dira ukatu datuen onurak, edo behintzat datuen erabilera zentzudunaren onurak: informazio, ezagutza eta adimen gehiago. Guzti hau gizartearen eboluzioa, portaera, beharrak... askoz hobe jakiteko, ulertzeko eta aurreikusteko.
Beste modu batean esanda, egiten eta pentsatzen duguna, gustatzen zaiguna, nora eta nola mugitzen garen, zeintzuk diren gure erlazioak, zer ikasi dugun, non egiten dugun lan. Gure osasun datuak “munduari” kontatzen dizkiogu. (...) Ez pentsa informazio hori “hor” gelditzen denik. Enpresa, gobernu eta erakunde ugari daude datu guzti horien bila, prestaketan eta analisia egiten. Ez dakigu zein interesen atzetik, eta gainera, ez daukagu horrenganako inolako kontrol aukerarik.
Teknologi berriak, askatasun eta konektibitatearen promesarekin haren kontrolpean jarri gaitu. Kezkagarriena da pozik eta konturatu gabe jarri garela horretan lanean. Datuak sortzeko aparailuak eta konexioak mantentzeko ordaindu eta guzti egiten dugu.