Denbora nahikoa daramagu gure lan merkatuko arazoez hitz egiten. Behin-behinekotasun handia dagoela da arazo nagusia: bi kontratuetatik batek hilabete bat baino gutxiagoko iraupena dauka, 2016an eginiko kontratuen % 40 aldi baterakoak dira eta soldatak nabarmen egin dute behera, langabezia murrizteko helburuarekin martxan jarri zen lan erreforma baten ondorioz.
Arazo horiek guzti horiek soluzio bilakatuko lirake honaino ekarri gaituzten austeritate politikak aldatzeko gai izango bagina. Kontratazioa egonkorra balitz -lanaldi osokoa eta soldata duinarekin ordaindua- kontsumoa hobetu egingo litzateke, eta kotizazioak handitu egingo lirateke. Hala, Gizarte Segurantzako diru sarrerak ugarituko lirateke eta, modu horretan, pentsioek utzi egingo liokete arriskuan egoteari. Gure Foru Aldundiek diru gehiago bilduko lukete horrela, eta ekarpen handiagoa egin ahalko liokete Eusko Jaurlaritzari, gure Ongizate Estatuaren oinarriak hobetzen eta/edo finkatzen jarraitzeko: hezkuntza, osasun sistema eta gure gizarte babeserako sistema propioa, Sarrerak Bermatzeko Errenta. Arestian aipatutako aldaketa horiek guzti horiez gain, komenigarria litzateke 2017an gutxiengo soldata 800 eurotara igotzea, sektore pribatuko soldaten igoera bultzatu dezaten, eta Espainiar Estatuko bataz besteko soldataren % 60ra hurbildu gaitezen.