Aiaralde Egunkarian ostegunean animalien banadonuari buruz idatzitako erreportajearen azpi-atal bat da ondorengoa.
Amukatu eta Hiru-A dira Aiaraldean katu kolonien problematika lantzen duten bi elkarteak. Lehenak Amurrioko koloniak kudeatzen ditu, eta laster Urduñan, Laudion zein Aiaran esku hartzeko asmoa du, bertako udalen laguntzarekin.
Hiru-Ak, bere aldetik, Artziniegako Eguzkimendi auzoan zegoen kolonia kudeatzeari ekin zion lehenbizi, baina badu herriko Alde Zaharreko koloniak kontrolatzen hasteko asmoa ere. Uda baino lehen ekin nahi diote elkarteko kideek lan horri, udalak emandako diru-laguntza bat eta lan boluntarioa baliatuta.
Harrapatu, esterilizatu, askatu
Hiru pausotan laburbildu daiteke bi elkarteek katu-koloniei aplikatzen dieten prozesua. Katuak harrapatu, albaitari baten laguntzaz esterilizatu eta berriz aske uzten dituzte. “Modu horretan ugaltzea eta gain-populazio bat gertatzea ekiditen dugu”, azaldu du Belen Diego Alvarezek. Amukatuko kideak ziurtatu du katu osasuntsuen kolonia bat “edozein hirigunerekin bateragarria” dela, eta “arratoien izurriteen aurka” baliagarria izan daitekeela. “Lehen gainpopulazio arazo bat zegoenean udalek enpresa bat deitzen zuten katuak hartu eta sakrifikatzera eramateko”, salatu du, “eta horrek ez du ezertarako balio, hutsik geratzen zen espazio hori beste katu batzuek okupatu ohi zutelako”.