aiaraldea.eus

Herrera de la Manchako kartzelara bidaia

Erabiltzailearen aurpegia Iñaki Ibarrola Atxa
Herrera de la Manchako kartzelara bidaia

Larunbatean Laudio, Amurrio eta Urduñako hainbat eta hainbat pertsonek Herrera de la mantxako kartzelaraino bidaiatu zuten bertan preso dagoen Pablo Gorostiaga laudiarrari eta, orokorrean, euskal preso politiko guztiei elkartasuna adierazteko asmoz.

Ostiral gauean abiatu ziren herritarrak martxarako prestatutako busean. Gasteiz parean Guardia Zibilak autobusa gelditu eta bertan zihoazenak identifikatu zituen; berdin gertatu zen soinu ekipoa eta janaria zeramatzan furgonetarekin.

Hurrengo eguneko eguerdian iritsi ziren Herrerara. Guardia Zibilak autobusa kartzelatik aldendutako zelai batean aparkarazi zuen. Bidaiariak beharrezko materiala hartu eta Presoak etxera jartzen zuen pankartaren atzean abiatu ziren kartzelarantz.

Kartzelaren alboan kokatutako zelai bateraino joan eta bertan egon ziren ordu pare bat. Soinu ekipoaren bitartez musikaren erritmopean bidali zizkieten elkartasun keinuak eraikinaren barrotedun leihoetatik agurtu egiten zituzten presoei. Kantuak, bertsoak, agurrak… denetarik erabili zuten aiaraldearrek presoen animoak sendotzeko.

Bueltako bideari ekin baino lehen, bertaratutakoek Pablo Gorostiagaren gutun bat irakurri ahal izan zuten, zeinean Laudioko alkate ohiak biziki eskertu zuen Aiaraldetik helarazitako elkartasuna. 

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa