Laudioko Kultura Etxean elkartuko dira eskualdeko emakumeak ostegunean, greba feminista prestatzeko asmoz. 19:00etan izango da zita.
"Ez da greba deialdi ohikoa izango, gutxienez 4 ardatz izatea proposatzen da", adierazi dute ohar bidez. Horien artean daude zaintzen greba, kontsumoarena, jantokietakoa eta ikasleena. Euskal Herriko mugimendu feministak luzatu du deia, Argentinako "Ni una menos, vivas nos queremos" ekimena jatorri hartuta. Izan ere, iaz egin zuten bertan protesta.
"Emakumeen* greba"
"Emakumeak* deituko ditugu grebara", azaldu dute. Izartxoa erantsi diote leloari transgeneroa ere aintzat hartu dutelako, hots, emakume transak.
Iragan astean egin zuten Arabako bilera, eta herriz herri ekintzak diseinatzen dabiltza dagoeneko. Grebaren zergatiaz galdetuta, argi dute: "Hainbat dira emakumeok greba egiteko ditugun arrazoiak; sistemak hil, prekarietatera kondenatu eta zanpatzen gaitu. Ez zaigu egiten dugun lana aitortzen”. Bizitza sostengatzen dute zaintza lanak errekonozitu gabe daudela ere salatu dute.
Eskualdeko hitzorduaren ondotik, herrikakoak antolatzeko asmoa dute. Amurrion, esaterako, datorren ostiralean -otsailaren 9an- batuko dira, 18:30ean Kultura Etxean.