Harrera ona izan dute Lezamako Jaiek. 20 bikotek hartu zuten parte larunbatean egin zen mus txapelketan. Herrien arteko norgehiagokan, aldiz, lau talde aritu ziren: Amurrio Trail Taldea, Nerbioi Errugbi Taldea, Artziniegako taldea eta Lezamakoa. Artziniegako taldeak lehen aldiz hartu zuen parte; sokatira taldea sortzeko jendearen bila daude.
Lau talde, bost proba
Bost proba gauzatu behar izan zituzten parte hartzaileek: lokotx bilketa, sokatira, ingudea, trontza eta belar fardel jaurtiketa. Azken proba horrek Lezaman du jatorria. Herrian abeltzain asko zeudenez baserritar gehienak trebeak ziren belar fardelak jaurtitzeko, eskuz pilatzen baitziren atoietan garraiatzeko zein lastategietan gordetzeko. Gaur egun trebezi hori galdu da, geratzen diren baserritarrek traktorez mugitu behar diren fardel handiak erabiltzen baitituzte.
Lau taldeek giro onean hartu zuten parte eta ondoren frontoian Burutxagak prestatu zuen parrilladan afaldu zuten. Gauean berandura arte luzatu zen giroa The Pushermen talde urduñarrarekin eta erromeriarekin.
Baina larunbat gaueko parrandak luzerako jo zuen arren, igande goizean dozenaka bildu ziren herrian, mendi ibilaldian parte hartzeko asmoz. Nagusientzako bazkariarekin eman zieten amaiera jaiei.
Argazkiak: Iñaki Ibarrola Atxa, Iñaki Ibarrola Aldaiturriaga, Maddi Isasi, Eukene Aldai eta Fontso Larrazabal