Apirilaren 4tik 11ra 2.560 kilometro egingo ditu Korrikak euskararen alde Euskal Herrian barrena. Gaur goizean aurkeztu dute ibilbidea. Aiaraldetik bi egunetan pasatuko da: apirilaren 10ean eta 11n. Aurreneko bisitan Urduña, Amurrio, Arespalditza, Laudio eta Arrankudiaga igaroko ditu; apirilaren 10ean, hain zuzen. Biharamunean Enkarterritatik itzuliko da eskualdera, Artziniega eta Aiara zeharkatzeko. 21. Korrikak ez ditu Orozko eta Okondo zapalduko.
Ordutegiak herrika
1335-1401. kilometroak osatuko dituzte aiaraldearrek. Asteazken goizaldetik -05:39tik- hasita, zazpi ordu eta erdiko bidea aurreikusi dute. Izan ere, 9:25ean agurtuko dute arrankudiagarrek euskararen aldeko ekimena. Honakoak izango dira herrietako lehen kilometroak:
- URDUÑA: Apirilaren 10ean, 05:39an, Izarrako bidetik (Barrerillatik) hasita.
- AMURRIO: Apirilaren 10ean, 06:11n, Urduñatik etorrita.
- ARESPALDITZA: Apirilaren 10ean, 7:10ean, Amurriotik igota.
- LAUDIO: Apirilaren 10ean, 8:17an, Luiaondotik pasata.
- ARAKALDO: Apirilaren 10ean, 9:12an, Areta atzean utzita.
- ARRANKUDIAGA: Apirilaren 10ean, 9:25ean, Arakaldori lekukoa emanda.
- ARTZINIEGA: Apirilaren 11n, 8:57an, Aiarako mugak igarota (8:18an iritsiko da Aiarara Balmasedatik Korrika)
Berria egunkariak egun guztietako ibilbidearekin infografia osatu du. 20. edizioak irudi bereziak utzi zituen eskualdeko herrietan, oso jendetsua izan baitzen. Artziniegatik iritsi zen orduko ekimena eskualdera:
Lainopean zeharkatu zituen Urduña eta Amurrion, egunsentian:
Bi aldiz murgildu zen ekimena Amurrion, Arespalditzatik bertara itzuli baitzen berriro:
Orozko, Laudio eta Arrankudiaga herriak lotu zituen ondoren:
Aiaraldea hedabideak webgune berezia sortu zuen Korrikaren jarraipena egiteko. Bertan daude ikusgai argazki bilduma,artikulu eta bideo guztiak.