[ANALISIA] Udal hauteskundeetan ez dira Kongresuko emaitzak errepikatuko

Kongresu eta Senatuko hauteskundeak duela aste gutxi izan ziren eta emaitza esanguratsuak utzi zituzten alderdiei dagokienez. Hala ere, oso zaila izango da bozka kopuru berak ematea maiatzaren 26ko hitzorduan.

Hasteko, aintzat hartu behar da muturreko eskuinaren politikek jende ugari mobilizatu zutela. 2015ean udal hauteskundeetan parte hartze maila %67an kokatu zen, eta apirilaren amaieran batezbestekoak %70a gainditu zuen nabarmenki. Esaterako, Amurrion %76,5era heldu zen.
Horrek bereziki eragingo die  bozka gehien lortu zuten alderdiei, EAJ, EH Bildu eta PSE-EEri, nagusiki, ohikoan boto ematera joaten ez den jendearen babesa eskuratu baitzuten. Horrez gain, udal hauteskundeetan bestelako aukerak hautatzen dituztenetako batzuk ere alderdi horiek bozkatu zuten.

Adibidez, PSE-EEk Laudion 2.223 boza izan zituen apirilean, eta 2015ean 1.102 izan ziren.
Zentzu horretan, kontuan hartu behar da maiatzeko hauteskundeetan talde independente ugari aurkeztuko direla berriro: Aiara Batuz, Amurrio Guk Bai, Omnia, Orain Amurrio, Adie, Okondo Aurrera... eta hainbat jenderen babesa dutela udalerrietan, euren zinegotzi kopuruak erakusten duen moduan.

D´Hont legeak talde bozkatuenak saritzen ditu. Ondorioz, talde txikiek zinegotziak lortzeko zailtasun gehiago izango dituzte zenbait lekutan

Gainera, talde berrien agerpena jaso da; Laudion Elkarrekin Podemos eta Vox, eta Amurrion Vox. Horrek gehiago sakabanatuko ditu botoak, D´Hont legeak talde bozkatuenak saritzen baititu. Ondorioz, talde txikiek zinegotziak lortzeko zailtasun gehiago izango dituzte zenbait lekutan, adibidez, PPk Laudion edota Amurrion emaitzen arabera. Bestalde, ordezkaritza lortzeko lehia udalbatzan alderdi horien artean gogortuko da.

Bukatzeko, ez da ahaztu behar Kongresuko eta udal hauteskundeen arteko alde nagusiak: hurbiltasuna eta tokikotasuna. Berez, parlamentuan politika ezberdinak egiteko aukera eta beharra dago. Eskuina eta ezkerrak jarduera kontrakoak proposatzen dituzte argi eta garbi. Udalerrietan, ordea, hainbat esparrutan joera politikoa nabaritzen bada ere, inbertsioak eta proiektuak gauzatzeko tartea oso mugatua da, eta aldagai gehiago hartzen dituzte kontuan bozkatzaileek: hautagaia, aurreko 4 urteetan egindako lana, zuzenean eragiten dizkieten udal arazoak...

Hala ere, herriak izango du azken hitza.