Bart sutea piztu da Lezamako baserri batean eta Aiarako Suhiltzaileek bertan eman dute gaua. Berez, etxebizitzak kalte larriak izan ditu baina larrialdi zerbitzuek alboko eraikina onik jarraitzea lortu dute.
Baserriko jabeak erredura arinak sufritu ditu eta ospitaleratu dute. Aiarako Suhiltzaileek azaldu dute ez dakitela kea arnastu ote zuen, anbulantzia artatzen ari baitzen eurak heldu zirenean.
20:30ean jaso zuten larrialdi zerbitzuek deia eta berehala bitarteko guztiak bideratu zituzten Lezamara. Zehazki, 3 kamioi joan ziren Laudiotik eta Langraitzetik beste bi heldu ziren laguntza gisa.
Inosoko baserri batek sua hartu du. Suhiltzaileak bertan.
— Arabako Foru Suhiltzaileak (@BomberosAraba) March 5, 2020
Tximiniako hodiak maiztasunez garbitzea gogoratu.
Incendio en caserío de Inoso. pic.twitter.com/gdAGqZt8LS
Izan ere, sua oso zabalduta zegoen, deiak informatu zuenez. Suhiltzaileak lekura heldu zirenean, garrak teilatuan eta ganbaran ikusi zituzten. 00:30ean itzali zituzten, baina prebentzio neurriak hartu zituzten eta talde bat geratu da Lezaman 09:00ak arte.
Suhiltzaileek jakinarazi dute Twitter bidez "gau gogorra" izan dela eta artaldea ere salbatzea lortu dutela. Gaur eguerdian, bada ez bada, Lezamara joko dute.
Hasieran larrialdi zerbitzuek adierazi zuten Inoson izan zela istripua, baina Lezaman izan dela argitu dute.