Korrikaren lekukoen segida: Furgonetatik

Erabiltzailearen aurpegia

Txikitatik izan naiz Korrikazale. Amatxuk dauka horren errua, berak transmititu zidan 2 urtean behin, gure herri hau zeharkatzen duen erokeri eder horrekiko maitasuna.

Oraindik euskarak gure herri honetan duen garrantzia zein zen jakin gabe, musikadun furgonetaren atzetik korrika ibiltzen nintzen poz-pozik.

Goizez egin dut korrika, gauez, eguzkiarekin edota euritan, lekukoa eskutan edo eraman gabe.

Inoiz ez dut ahaztuko unitate mugikor moduan ibili nintzen urtea: sakelakoa eskuan, bizikleta gainean, Laudiotik Amurriora, gau euritsu hartan.

Azken urteetan, Aiaraldea hedabideko kolaboratzaile gisa, furgonetan joateko ohorea izan dut.  Zein desberdin ikusten den gainetik, zein handi eta bizi; zelako poza, herria baturik, kilometroz kilometro. Batzuetan 4 lagun besterik ez; bestetan, milaka; baina beti, gelditu gabe. Zaharrak eta gazteak, kirol arropa edo mozorrodunak, errepidearen ezkerretik edo eskuinetik, baina denak batera, aurrera, euskararen alde.

Korrika da aldarriz betetako aldarria. Aurrean, gaztetxeroak  banderekin, pixka bat erdirago, falta direnen aurpegiak; eta, atzean, borrokan dauden langileen oihuak. Bukatu da, ordea, niretzako. Furgonetatik jaitsi eta urruntzen ikusi dut. Bi urte barru arte, Korrika!

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide