EH Bilduk prentsa ohar bidez azaldu du prest dagoela abstenitzeko aurrekontuen bozketan, baldin eta Udal Gobernu Taldeak 690.000 euroko inbertsio plana bermatzen badu.
Orain Amurriok aurka egingo du eta Amurrio Guk Baik jakinarazi du litekeena dela gauza bera egitea, euren ustez, EAJk iazko zuzenketak sartu ez dituelako.
Gauzak horrela, EH Bilduren abstentzioak lagundu dezake aurrekontuen onarpena gauzatzen, baina koalizioak aipatu du Udal Gobernu Taldeak ez diela jarrera irmorik erakutsi, momentuz. Horregatik, planarekiko babes publikoa eskatu diote EAJri.
Inbertsio plana
EH Bilduk gauzatu nahi duen inbertsio planean, 300.000 eurokoa da egitasmo garestiena: gasolindegi zaharrean zegoen tokian errotonda jartzean datza.
Izartzako Guardetxea abian jartzeko beste 40.000 euro erabiltzea nahi dute udal taldeko kideek, eta 45.000 euro gehiago eskatu dituzte baita ere, tokiko espezieen landaketak egiten jarraitzeko, baso publikoaren kudeaketa planari jarriki.
Horrez gain, Landako auzoaren eta Maskuribai industriagunearen arteko lotura ahalbidetuko duen konponketarako 62.000 euroko gastua egitea eskatu du EH Bilduk.
Parte hartzea
Horrez gain, parte hartze prozesuen bidez jasotako ekarpenak egikaritzeko 240.000 euro nahi dituzte.
Bigarren fasea: Aztarna Museoa, San Pedro mendia...
Soberakinetatik bitarteko ekonomiko berriak aktibatzen direnerako, EH Bildu Amurriok lehentasuntzat jotzen ditu hurrengo egitasmoak: Aztarna museoaren konponketa eta birkokapenera 30.000 euro bideratzea, 60.000 euro San Pedroko mendiari balioa emateko, 40.000 euro agertoki berri baterako eta 15.000 euro etorkizuneko musika eskola parte hartze prozesu baten bidez egiteko.
Planak eta arauak sortzea
Inbertsio plan horrekin batera, bestelako aurrekontu-konpromiso batzuk mahai-gaineratu ditu EH Bilduk. Besteak beste, mugikortasun jasangarrirako plan berria, etxebizitzaren inguruko ikerketa, ziklo motzeko landaketak mugatuko dituen araua erredaktatzea edota jardunaldi osoan egongo den euskara teknikaria. Udal Gizarte Zerbitzuetan eta Nagusien Etxean ere eragin nahi du koalizioak.
