Emaitza oso onekin esango dio agur urteari Zuriñe Frutosek. Mendi lasterketetan, BTT probetan, duatlotietan zein lokotx-bilketa txapelketetan parte hartu du, eta guztietan garaipen ugari bildu ditu.
23 lasterketatan aritu da orotara: 17 trail-lasterketa eta 6 BTT froga. Lasterketa guzti horietan hamaika aldiz lortu du podiumaren tokirik gorenera igotzea, beste sei bigarren postu eta lau hirugarren postu ere eskuratu ditu.
Ibizako mendi bizikleta biran parte hartu du aurten lehendabizikoz, Frutosek oso positiboki baloratu du hiru egunetako 200 kilometrotako lasterketa hau.
Duatloiak
Lasterketa soiletan ez, duatloietan ere buru-belarri aritu da Artziniegako kirolaria. Hamar duatloietan lehiatu da eta guztietan lortu du lehenengo postuan gailentzea. Horri esker Euskal Herriko mendi-duatloien txapela jantzi du. Ez da aurten janzten duen txapel bakarra, lokotx-bilketan Euskal Herriko eta Arabako txapelduna izan baita.
Une gogorrak eta lesioak
Emaitza borobil horiek guztiek ez dute, ordea, aurtengo denboraldiak utzi dion zapore gazi-gozoa ezabatzea lortu.
Apirilean jasan zuen lesioak hilabete luzez lasterketetatik kanpo mantendu zuen, denboraldiko garai bizienean, alegia. Horren ondorioz, txapelketa eta lasterketa garrantzitsu askotan ezin izan zuen parte hartu.
Urte berriari begira dago jadanik Zuriñe Frutos. Iazko urteko emaitza bikainak berdindu nahi ditu 2018an. Iaz 34 lasterketatan parte hartu zuen eta 27 aldiz igaro zuen helmuga lehen postuan.
