Laudioko Tokiko Garapen Agentziak 2015-18 legealdiko Enplegurako sektore-kontseiluaren bilera zikloa abian jarri du maiatzaren 12an burutu berri den Enplegu Batzarrarekin. Aurreko legealdian eta 2015. urtean izandako jardunaren balantzea eta datozen hiru urtetarako egitasmoak izan dituzte aztergai, besteak beste, eragile sozialak, erakundeetako ordezkariak eta alderdi politikoetako ordezkarien foroan.
Aurreko legealdian dinamika horren ondorioz bultzatutako ekimenei dagokienez, Laudioko udalak Arabako Merkataritza Ganberarekin luzatu berri duen elkarlanerako hitzarmena baliatuta sortu den Enpresen Foroa azpimarratu du Iñigo Martinez Cerrillok, Tokiko Garapen Agentziako zinegotziak.
Horrez gain, herriko lurzoru industrial beharrak eta egun definituta dauden esparruen erabilpen aukerak aztertzeko udalak, SPRIk (Enpresa Garapenerako Euskal Agentziak) eta Araba Garapen Agentziak osatuko duten organoaren garrantzia azpimarratu du EH Bilduko zinegotziak.
Garapen Agentziaren Balantzea
Laudioko Tokiko Garapen Agentziak 2015. urtean trebakuntza, enpleguaren sustapena, ekintzaile eta ETEak eta merkataritza arloetan izandako jardunaren balantzea eskaini du.
Prestakuntza arloari dagokionez, 577 pertsona aritu dira antolatutako 39 trebakuntza jardueratan. Langabetuak, enplegua eskuratzeko aukerak hobetu nahi duten pertsonak, ekintzaileak, langile autonomoak eta merkatariak izan dira ekimenetako edukiek kontuan izan dituzten profilak.
23 pertsona enplegu planetan aritu dira eta Nerbioiko ur-bazterren garbiketa
Tokiko Garapen Agentziak 300.000 euro erabili ditu; guztira 23 pertsona lanean aritzea ahalbidetu duten lau planetan. Atal horren finantzazioaren %54a Eusko Jaurlaritzak emandako diru-laguntzen bidez gauzatu da eta gainerako bitartekoak, %46a, Udalak berak sortu ditu.
Atal horretan 2015. urtetik oraindik bideratu gabe dago Nerbioi ibaiaren ur-bazterrak garbitzeko plana. Izan ere, gizarteratze enpresen bidez bideratzeko asmoak, Laudioko udala bakarrenetakoa da horrelako aukera jorratzen, Ura Agentziak horrelako zereginetarako ezartzen dituen bermeen kudeaketa zaildu du.
Egitasmoaren memoria helarazi dio Garapen Agentziak Urari eta plana aurki abian jartzea espero dute arduradunek.
Ekintzaileen sustapena
Ekintzaileen atalari dagokionez 15.000 euro bideratu ditu Tokiko Garapen Agentziak saltoki edo enpresa asmoak sustatzeko laguntzatan eta 36 ekintzaile hurbildu dira 2015eko maiatzetik abendua bitarteko tartean Merkataritza Ganberarekin eskaintzen den aholkularitza zerbitzura. Azken horretatik 5 ekintzailek aurrera atera dituzte fisioterapia, dantza akademia, energia aholkularitza, argazkigintza-estudio eta tatuaje proiektuak.
Merkataritza atalean berriz, PERCO ikerketaren berrikusketa eta merkataritza plan estrategikoa abiatu dira 2015ean. Horrez gain, udala eta APILLen arteko hitzarmena %25ean handitu da.
2016rako egitasmoak
Udalak maiatzean onartu behar duen aurrekontu proposamenak 980.000 euro aurreikusi ditu Tokiko Garapen Agentziarako. Bere jardunaren ardatzak izango dira enplegu planen sustapena eta gainerako erakundeekin, Arabako Foru Aldundia eta Eusko Jaurlaritza batik bat, elkarlana areagotzea, ahalik eta diru-laguntza deialdi aukera gehienak jorraturik.