LAB sindikatuak Aiala Vidrio enpresak asteartean Enpresa Batzordeari aurkeztu berri dion enplegu erregulazio espedientearen aurka azaldu da. “Ezezko borobila ematen diogu Aiala Vidrioko espediente honi eta gure eskuetan dagoen guztia emango dugu aurrera eraman ez dezaten” adierazi du sindikatu abertzaleak.
Hortaz, 6 hilabeteko EEE proposamena, 2014ko urritik 2015eko martxoa bitartean, jarri zuen mahai gainean Aiala Vidrioko zuzendaritzak langileen ordezkariekin asteartean, ekainaren 17an, izandako bileran; langile bakoitzak gehienez 30 egun egingo lituzke egora horretan.
Enpresaren aitzakiak
“Enpresaren aitzakia Vidrala taldeak duen stock tamaina da eta hori zuzentzeko Aiala Vidrioko labe bat geldiarazi nahi dute, produkzio gutxiago egiteko” azaldu du LABek. “Arazoa pasa den urtetik datorrela diote eta aldi berean aurten, estatuko beste lantegi batean Laudioko antzeko beste labe bat martxan jarri dute, produkzio ahalmena handituz, beraz, dioten arazo hori handituz” azpimarratu dute enpresak luzatutako argudioen harira.
LABek eskainitako bileraren balorapenean Aiala Vidrioko langileek lan erreformaren kontra eta beraien hitzarmenaren alde eramandako borroka azpimarratu du: “gure ustez enpresak langileei ordainarazi nahi die orain arte lortutakoa”.
Honez gain, sindikatu abertzalearen arabera, Vidrala taldeak argitaratutako azken balantze ekonomikoetako etekinak historikoak izan dira. Egoera ekonomiko horren aurrean ulertezina deritzote “langileen langabezi prestazioa, diru publikoa, erabiltzea euren etekin ekonomikoak sendotzeko”.