Hilabeteak pasa dira Laudioko udal gobernuak talde kultural eta sozialei gune kultural baterako proposamena aurkeztu ziela. Bertan, udaletxe ondoko orube hutsean, Aldai plazara ematen duena, zinea edota teatroa egiteko aukera azaltzen zen.
Proposamena Obra eta Hirigintza Sailaren Batzorde Informatibora eraman zuten pasa den asteko astelehenean. Bertan, ikerketa xehatua egingo dela azaltzen da. Horren ardura Cultiva eta Map enpresak izango dute, biak Udalarekin kolaborazioan. Hauek egindako proiektuak udalerrian gune kultural berriak lortzea du helburu.
Ikerketa xehatuak lau helburu izango ditu. Lehena, egun indarrean dagoen Hiri Antolamendurako Plana kontutan hartzea eta ibai inguruen eragina kontutan hartzea; bigarrena, orubearen eraikigarritasun aukera maximoak zehaztea; hirugarrena, proiektu kultural bat sortzeko orubearen lur azpiko bolumenean espazio eszeniko baten ekarpena definitzea; eta laugarrena, udal estrategia eta araudia errespetatzen duten lur gaineko erabilerak analizatzea, hau da, zer egin daitekeen eta nola egin behar den zehaztea.
Ikerketa egiteko lau hilabete izango dituzte. Hilabete bakoitzean helburu bat bermatuko da. Besteak beste, espazio kulturalaren edukiera analizatuko dute. Aurre estudioaren arabera 309 eserleku inguru egongo dira, gutxi gora behera. Gainera, ikerketa teknikoa egingo da, proiektuaren bideragarritasuna aztertzeko, hala nola beharren programa ere, horretarako kultura planean egindako ekarpenak kontutan hartuz. Lur gaineko erabileren artean liburutegia edota zaharrentzako lokal sozialaren aukerak aztertzen ari dira.
Proiektuaren kontratazioa talde politiko, kultural eta sozialen, nahiz herritarren parte hartzearekin erabakiko da. Estudioa 2014an amaieran bukatuta egotea aurreikusten dute, eta lan horren kontratazioak 21.659 euro balioko ditu. Udalaren arabera, dirua 2013ko aurrekontuetan erreserbatutako partidatik aterako dute, eta, beraz, ez du gastu gehigarririk eragingo.