Lorea Agirrek Korrikaren amaieran aipatu zuen bagarela nor eta euskararena auzi politikoa dela, nire aldetik hitz horiek berrestea. Kontua da euskararena auzi politikoa bada zergatik ez den politikoen auzia. Zergatik diodan hau? Eskualde osoko zerrendak begiratuta, alderdietako zenbat zerrendaburu dira euskaldunak? Zerrendan agertzen direnen artean zenbatek ezagutzen du euskara?
Euskararen ezagutza aurkezten diren zerrendakideen %100k izan beharko luke, baina hori horrela ez dela jakin badakit.
Egia da, alderdi batzuek horri garrantzia gehiago ematen diotela eta beste batzuentzat horrek ez duela inongo garrantzirik, eta zoritxarrez izango ere.
Hala ere, harritu nau alderdi batek bere zerrendan doazenei eta euskara dakitenei zelan “euskalduna” abizena jarri dien horiei guztiei. Hori horrela agertzea balio erantsia ematen dio zerrendari/zerrendakideari? “Euskalduna” etiketa ez dutenak gutxiago dira? Hala bada, zergatik doaz zerrendan?
“Euskaldun” abizen hori desagertu behar da, normaltasun itxura emango badugu, eta abizenik agertzekotan “erdaldun” abizena ager dadin, denon begi bistan gera dadin inoren gabezia.
Gainontzeko alderdiek bere ohiko trataera eman diote, nork bere normaltasunetik. Baina esan behar diegu euskara auzi publikoa dela euskara zentrora eta plazara agertu behar dela, euskara elkarbizitzarako tresna dela, euskararena eztabaida publikoa dela, ez dela norberaren auzia.
Gu guztion auzia delako ezin dugu normaltasunez hartu zerrendetako hautagaiak erdaldunak izatea, euskaldunok ahaldundu behar dugu eta botere publikoetan arituko direnek presio hori sentitu behar dute. Euskaldunok Aiaran, abizenen beharrik gabe ere, bagara nor eta.