GENTZANE ALDAI CALONGE

"Kirol denetan bezala, pilotan ikusgarritasuna eta abiadura behar da"

Erabiltzailearen aurpegia

Programa berezia izango da 'Plazandreak': pilota txapelketa izango da, baina partidetan ikusi ohi ez diren irudiak ere emango dituzte. Aldairen ustez, ezinbestekoa izango da emakumezkoen pilota sustatzeko.

Emakume Master Cupeko Binakako txapelketan pilota mistoko modalitatean txapeldunorde izan berri da Gentzane Aldai (Orozko, Bizkaia, 1994), baina uda honetan bestelako rol bat hartuko du: ETB1en gaur estreinatuko den Plazandreak programaren aurkezleetako bat izango da Iñigo Aiestaran eta Elena Azpeitiarekin batera. Lau taldetan banatuta hamabi pilotarik parte hartuko dute pilota txapelketa horretan, eta astean behin bi taldek elkarren aurka hiru partida jokatuko beharko dituzte. Gaur 22:30ean eskainiko dute lehen saioa, baina aurrerantzean ostegunetan emitituko da.

Emakumezkoen pilota sustatzeko pauso berri bat da saioa?

Bai, duda barik. Aspalditik Laboral Kutxak eta ETB1ek sekulako apustua egin dute Emakume Master Cup babestuz, eta orain beste txapelketa bat izango da programa formatuan. Erreferente femeninoak sortzeko bidean aukera polita da; azkenean, kirol denak produktu baitira, eta saltzen ez dena ezin da erosi.

Programaren aurkezpenean esan zen modu berritzailean ekoiztuko dela. Nolakoa izango da Plazandreak?

Ez da ikusiko partida bakarrik, baita pilotariek takoak zelan jartzen dituzten ere. Txapelketa berezia izango da, talde bakoitza hiru pertsonarekin osatua baitago, eta jardunaldi bakoitzean hamabi tantoko hiru partida jokatu beharko dituzte: banaka, lau eta erdian; binaka; eta hirugarrena berriz lau eta erdian. Pilotarietako batek bi partida jokatu beharko ditu. Jardunaldi bakoitzean hiru puntu egongo dira jokoan, eta talde bakoitzak bere entrenatzailearekin landu beharko du estrategia, eta hori ere ikusi ahalko da. Normalean ez da halakorik ikusten.

Unean bertan erabakiko dute nork jokatuko duen azken partida?

Bai, hori da.

Sasoi onean iritsi beharko dira horretarako...

Bai, argi dago. Hamabi tantora dira partidak, baina pilota mistoa da, eta asko eskatzen du. Ez bakarrik eskuen aldetik bakarrik; hanka gogorrak izan behar dira, eta orduan fisikoki ondo eutsi behar zaio.

Pilota mistoarekin jokatzeak ere ikusgarritasun handiagoa emango dio jokoari...

Bai, argi dago. 2016an Emakume Master Cupa hasi zenean, ezinezkoa zen material horrekin hastea, denok berde baikeunden. Baina orain, profesionalizazio bide horretan, argi dago emakumezkoek ere pauso hori eman behar dutela, eta ari dira ematen. Kirol guztietan bezala, pilotan abiadura eta ikusgarritasuna beharrezkoa da.

Kantxatik atera eta aurkezle lanetan arituko zara. Nola hartu duzu pauso hori?

Urduritasun puntu bategaz, baina Iñigo eta Elenarekin gustura sentitzen naiz. Kantxa kanpotik gauzak askoz errazago ikusten dira, baina egun bakoitzeko sentsazioak ezberdinak izaten dira barruan. Ni saiatuko naiz pilotariek sentitzen duten hori berben bitartez islatzen.

Inbidia sentituko duzu?

Bai, argi dago. Azkenean, udan sorosle gisa egingo dut lan, eta ordu eskasak dauzkat entrenatzeko. Saiatzen naiz eskuak mantentzen, eta fisikoki entrenatzen naiz, baina frontoian ordu asko sartu behar dira onenean egoteko. Ezin ditudanez sartu, nahiago nuen aukera hau aprobetxatu eta lekua beste norbaiti utzi. Baina inbidia puntua bai sentituko dut; ezin jokatzeak pena ematen dit.

Aurtengo udan jokatuko duzu?

Eduki ditugu hainbat partida eta txapelketa adostuta, baina gehienak bertan behera geratu dira. Gutxi jokatuko dut pilotan; beraz, irailean itzultzeko entrenatuko naiz.

Koronabirusak baldintzatu du programa?

Oraingoz partidak ikusle barik planteatu dira, baina ez dakit finalerako zer dagoen aurreikusita.

Elkarrizketa hau Berria.eus atarian plazaratu da eta Creative Commons lizentzia baliatuta ekarri dugu hona.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide