Laudioko Udalak hainbat enplegu programa martxan jartzen ari da egunotan, haietako bat Lanbideren bidez 15 lorezain kontratatzean datza.
Lan eskaintza ireki zuen Udalak Urriaren 11tik 25era bi kategoriarako: lorezain ofiziala izateko 12 postu eskaini ziren alde batetik eta lorezain langileburu izateko 3 postu, bestetik.
Hurregoak dira lanpostuen ezaugarriak: Lorezain ofizialaren lanaldia 8etatik 15:00ra da, sei hilabeterako kontratazioa da, 1126,01 euroko soldata brutoa, 1043,07 soldata garbia eta 15 egun naturaleko oporrak. Langileburu postuaren lanaldia berdina da, 1181, 06 euroko soldata brutoa, 1092,59 euroko soldata garbia.
Hautaketaren irizpideak
102 curriculum jaso ziren: 83 lorezain ofiziala izateko eta 19 lorezain langileburu izateko. Hasierako aukeraketan hautagaien curriculuma baloratu zen eta genero eta adin irizpideak ere kontuan hartu ziren. Emakumeen %99 elkarrizketatu zuten, Lanbidek zehazten duen moduan kontratazioen %40 emakumeek bete ahal izateko eta 55 urte baino gehiagoko hautagaien %99 ere elkarrizkatetatu zuten %15 adin horretako pertsonek bete ahal izateko.
Prozesu horren bidez 52 pertsona aukeratu zituzten 15 postuak betetzeko, 35 elkarrizketa egin ziren lorezain ofizial posturako eta 17 langileburu posturako. Elkarrizketak urriaren 27, 28 eta 31an gauzatu ziren, Sartu erakundearen Laudioko bulegoan.
Azkenean hautatu diren 15 pertsonetatik 11 iraupen luzeko langabetuak dira, 6 emakumeak dira, 8 pertsona DBE (Diru sarrerak Bermatzeko Errenta/RGI) jasotzen zuten, 2k 55 urte baino gehiago dituzte, 6k 45 urte baino gehiago dituzte eta 2k 35 baino gutxiago.
Hautagaien lan esperientzia eta prestakuntza baloratu da egoera sozioekonomikoa eta etorkizun perspektibekin batera.
Aste honetan bertan hasiko dira lanean kontratatutako pertsonak. Lorezain berriak herrigunean bakarrik ez Larrainon eta herriko nekazal bideetan ere arituko dira.
Laudioko Udalak beste bi enplegu programa abian jarriko ditu laster: ibaiaren garbiketa egiteko langileak kontratatzeko programa da bat eta Arabako Foru Aldundiaren laguntza batekin lotutakoa bestea.