44 urte bete dira Mendebaldeko Saharako herriak espainiar okupazioaren kontrako lehen mobilizazio baketsu masiboa martxan jarri zuenetik, Zamla izenez ezagutzen dena. Berau ospatzeko Amurrion sortu berri den “Convivencia y Solidaridad” saharar elkarteak hainbat ekintza antolatu ditu hurrengo egunetan zehar.
Ekainaren 17an, asteartea, arratsaldeko 19:00etan, katekesi aretoan, 1970eko mobilizazioen eta egun saharar herriak Aljeriako Tindoufeko kanpamentuetan pairatzen duen egoeraren inguruko hitzaldi bat izango da. Hitzaldi honetan saharar gobernuaren EAEko ordezkariak, giza eskubideen defentsan ezagunak diren hainbat pertsonek, Amurrio RASD elkarteko kideek... hartuko dute parte.
Hilaren 19an, osteguna, ordu eta leku berean Javier Bardem zinema zuzendari espainiarrak eginiko “Hijos de las Nubes” filmea ikusterik izango da, zeinak saharar herriaren egoeraren inguruko errektrospektiba bat eskaintzen baitu.
Hurrengo egunean, Reforreko futbol zelaian, arratsaldeko 19:00etan Kaskagorri eta Saharaiara futbol taldeek lagunarteko partida gauzatuko dute.
Azkenik, larunbatean, saharar jai kulturala burutuko da Amurrioko herriko plazan, 1970ko Zamlako oihua gogora ekarriko delarik. Goizeko 10:30etatik eta eguerdira bitarte saharar kulturaren paradigma diren hamaika ekintzez gozatzerik izango da: henna pintaketak, te dastaketak, jolasak, eskulangintza produktuen erakusketa... 12:00etatik 14:30ra arte ekitaldi ofizialak egingo dira duela 44 urteko gertaeren oroitzapen eta omenaldi gisa; bertan, Amurrioko udaleko eta EAEko saharar elkarteetako ordezkariek hartuko dute parte eta, besteak beste, sahararren eskubideen alde urtetan zehar borrokatutako Paco Bordagarai amurriarrari omenaldia egingo zaio. Bukatzeko, arratsaldeko 18:00etatik eta gaueko 21:00ak bitarte Estrella Polisario talde sahararraren emanaldia izango da, bertan Mufid abeslari ezagunak parte hartuko duelarik.