Prudentzio Deunaren jaieguna dela eta kalejiran aterako da Laudioko Danborrada, Prudentzio Deunaren bezpera gauean, apirilaren 27an, hain zuzen. Gaueko 22:00etan geratu dira Laudioko Aldai Plazan danborrak astintzen hasteko eta herrian zehar arituko dira kalejiran, danborren “tun-tunarekin”. Gauerdiko 24:00etan, Udaletxe aurrean, Prudentzio Deunaren Erretreta joko dute Arabako Zaindariaren omenez, aurtengo Danborradari amaiera emanez.
Halaber, igandean, maiatzaren 1an, XXIV. Barraskiloak Saltsan Gastronomia Lehiaketa izango da Laudioko Plazan eta antolatzaileek (Rakatapla eta Boilur) prestatutako barraskiloak dastatzeko aukera izango dute bertaratutakoak 12:30etatik aurrera.
Barraskilo lehiaketan parte hartzeko
Barraskiloak Saltsan Gastronomia Lehiaketan parte hartu nahi duen edonork adin nagusi izan beharko du eta ondorengo arauak bete beharko ditu:
- Prestatutako kazola bakoitzean, gutxienez 200 barraskilo egon beharko dira
- Behar diren osagai guztiak partaideek eraman eta aukeratuko dituzte
- Barraskiloak garbituta eta egosita eraman ditzakete
- Lehiakide bakoitzak bere sutegia eramango du
- Sukaldari bakoitzak bi laguntzaile izango ditu eta lehiakideak egongo diren lekuan ezin izango du beste edonor egon
Lehiaketaren antolatzaileek parte hartzaileek izan ditzaketen zalantza guztiak argitzeko prest egongo dira goizeko 9:00etatik aurrera. Izan ere, izena emateko epea 10:30etan itxiko da, doakoa da, eta kazolak 12:30ak baino lehen aurkeztu beharko dituzte. Epaimahaiak parte hartzaileen kazolak dastatu ostean - aurkezteko modua, puntuan egotea eta zaporea puntuatuko dute- sari banaketa egingo da. Bost sari egongo dira eta partaide guztiei oroigarri bana emango zaie:
- 150€, trofeoa eta txapela
- 120€ eta trofeoa
- 90€ eta trofeoa
- 72€ eta trofeoa
- 60€ eta trofeoa
Epaimahaiak irabazletzat izendatutako barraskilo kazolak, antolatzaileen esku geratuko dira. Epaimahaia antolatzaileekin zerikusirik ez duten pertsonek osatuko dute beti eta haien erabakia apelaezina izango da. Horrez gain, lehiaketa ospatzen ari den bitartean gorabeheraren bat gertatzekotan, antolatzaileek ez dira horren erantzule izango.