#Markatupuntueus lelopean, euskal komunitate linguistikoa Interneten ordezkatzen duen domeinua zabaltzeko kanpaina gaur bertan abiatuko da. Dagoeneko 4.000 domeinutik gora daude erregistratuta.
Abendua urtebete beteko da .eus domeinua erregistratzeko aukera ireki zenetik, eta bitarte horretan 4.000 domeinutik gora erregistratu dira, tartean gurea, Aiaraldea Komunikazio Leihoarena. Marka hori lortuta, PuntuEUS Fundazioak ahalegin bat egin gura du oraindik .EUS domeinua eskuratu ez duten enpresak, establezimenduak, erakundeak edota kultur taldeak erregistratzera animatzeko. Kanpainaren leloa #markapuntueus traola izango da eta eta bere helburua da .EUS gizartean errotzea eta sarean gehiago ikusiaraztea.
.EUS domeinua erregistratu ahal izateko baldintza bakarra dago: web gunean edukien zati bat euskaraz izatea edota euskaraz izan ez arren, euskarari edo euskal kulturari buruzko edukiak izatea. Oraingoan, kanpainaren bidez Fundazioak gizarteari zera galdetzen dio: zer marka nahi duzu .EUS izatea? Parte hartzeko, nahikoa da marka horri argazkia atera –edozein euskarritan- eta sareratzea #markatupuntueus traola erabiliz. Kanpaina irailaren 15etik urriaren 15era luzatuko da.