Erretes Lantenoko mendi-lasterketa larunbatean jokatuko da 18:00etan, herriko jaien baitan. Peregaña mendira joan-etorria egin beharko dute korrikalarien, 11,4 kilometroko ibilbide batean.
Bost egun besterik ez dira falta Peregaña Igoera mendi lasterketaren bigarren edizioa dela-eta Erretes Lantenoko plaza eta bideak betetzeko. Larunbatean jokatuko da proba, 18:00etan, Erreteseko jai batzordeak antolatuta, Ganzorrotz mendi taldearen laguntzaz, eta Kon Sport, Laboral Kutxa, Clariant eta beste laguntzaile askoren babesarekin
Lasterketa azkarra da Peregañakoa, aldapa gogorrekin, eta ez oso teknikoa. Ibilbidea iaz baino apur bat luzeagoa izango da, 11,4 km guztira, hasierako kilometroak Amusko mendiaren magaletik egingo direlako, basabide batetik; gainerakoak iazko ibilbide beretik egingo dituzte, Peregañako tontorrera igota (628 m) eta Beotegitik jaitsiz atzera ere Erreteseraino. Guztira 600 metro inguruko desnibel positiboa gainditu beharko dute parte-hartzaileek.
Inskripzioa doan
Izen-emateari dagokionez, doakoa izango da eta egunean bertan egin beharra dago lasterketa hasi eta ordu laurden lehenago arte irteera-puntuan ipiniko den mahaian. Sariak egongo dira lehenengo bost sailkatuentzat nesken eta mutilen kategorian, eta lehenengo aiararrentzat ere saria egongo da.
2014an izandako arrakastari eutsi nahian
Iazko edizioan izandako arrakastari eustea da jai batzordearen asmoa, 2014an ia ehun lasterkari batu baitziren Erretesen, tartean proba irabazi zuen Manuel Merillas, mundo osoko mendi korrikalari onenetako bat. Eskualdeko eta inguruetako atleta asko ere bertan izan ziren, maila guztietakoak. Izan ere, edonorentzako moduko lasterketa da Peregaña Igoera, eta mendiko lasterketetan hasteko oso egokia.
Jai-egitaraua beterik
Baina mendi-lasterketaz gain, asko dira zapatuan Erretesen izango diren ekitaldiak; jaiei 12:00etan emango zaie hasiera, eta eguerditik aurrera tailerrak, puzgarriak eta umeentzako jarduerak egongo dira, bai eta paella lehiaketa eta “krisiaren kontrako” poteoa. Arratsaldez berriz, mus txapelketareb txanda etorriko da 17:00etan, eta lasterketaren ondoren Aiara Dantza Taldearen emanaldia eta parrillada herrikoia. Amaitzeko, txikientzako disko-festa izango da 22:00etan, eta ondoren Bittor Gomezek eskainitako dantzaldia ordu txikiak arte.
Informazio gehiago duzue Peregaña Igoeraren FB orrialdean.