Arespalditza mendi bizikleta taldeak herriko mendi-txirrindularitza martxaren 7. edizioa antolatu du. Izena eman daiteke aurretiaz internet bidez ekainaren 13ra bitartean.
Beste urte batez, mendiko txirrindularitzaren zaletuek hitzordu polita izango dute Arespalditzan, bertako ibilaldiaren zazpigarren edizioarekin. Ekainaren 15ean izango da, larunbata, eta aurreko urteetan lez 200 lagun inguru biltzea espero da.
Ibilbideak 29 km luze izango ditu, oso gorabeheratsuak, gure inguruetan ohiko den bezala. Lehen kilometroetan Arespalditzatik Murgara joango dira ziklistak, handik Pagonabarra gainerako bidea hartu, eta bertan itzuli labur bat eginda Zuhatzara jaisteko. Zuhatzatik beste igoera bati ekingo zaio, Enegorta aldera, eta ondoren eguneko zailtasunik handiena etorriko da, Idubaltza gainera igoko baitira txirrindulariak. Azken jaitsiera Zerrabe auzoraino egingo dute eta handik Arespalditzako helmugara itzuliko dira.
Inskripzioa egiteko bi bide
Izena emateko bi aukera daude: aldez aurretik egin daiteke www.bttrespaldiza.com webgunearen bidez ekainaren 13a baino lehen, edo bestela egunean bertan. Aldez aurretik eginez gero federatuek 12 euro ordaindu beharko dituzte eta federatu gabekoek 15; egunean bertan egiten bada, berriz, 15 eta 18 euro ordaindu beharko dituzte hurrenez hurren.
Ekainaren 28an, Amurrion hitzordua
Arespalditzakoa ez da izango gure eskualdean ekainean egingo den mendi-txirrindularitzako proba bakarra; ekainaren 28an, Amurrion, “Ilunabar Erronka” deritzon lasterketa jokatuko da 17:00etatik aurrera. Lasterketa berezia izango da, txirrindulariak helmuga gaua heldu aurretik zeharkatzeko erronkari egin beharko diotelako aurre.