Amurrio Txirrindulari Elkarteak mendi-txirrindularitzako proba berezi honen bigarren edizioa antolatu du. Arratsaldeko 17:00etan abiatuko da Amurriotik eta erronka da eguzkia sartu aurretik amaitzea.
Urteko egunik luzeenak aprobetxatuz kirol-proba berezi bat egingo da Amurrion, aurten bigarren urtez: MB Ilunabarra Erronka. Probaren berezitasuna da -izenean antzeman daitekeenez- parte hartuko duten mendi-txirrindulariek 5 ordu inguru izango dituztela erronka bete ahal izateko, hau da, eguzkia sartu aurretik ibilbideak dituen 48 kilometroak betetzeko. Ez da erronka makala, 48 kilometro horietan 1800 metroko desnibel positiboa gainditu beharko dute eta.
Ilunabarra Erronkak ibilbide sano ikusgarria izango du: lehenengo zatia Amurriotik Inosoraino joango da, Larrinbe eta Goikomendi ingurutik; ondoren, Altubeko pagadian sartuko dira bertan 7 km egiteko eta eguneko aldaparik gogorrenetako bat gaindituz goi aldera heldu eta bertatik Untzaga herriraino joango dira, handik Delikaraino oso jaitsiera arin eta ikusgarria egiteko. Arrastarian barrena Tertangaraino joango da ibilbidea, eta handik Belandiaraino Gorobeleko tontorren azpitik doan basabidetik. Amaitzeko, Mendeikan barrena joango dira Amurrioko helmugaraino. Ibilbidea gehienbat basabideetatik joango da, eta %20 inguru baino ez da izango pista edo landa-errepideetatik, antolatzaileen esanetan.
Dagoeneko inskripzioak zabalik daude www.kirolprobak.com web gunearen bidez, ekainaren 24ra bitartean. Antolatzaileek 300 laguneko muga jarri dute, eta prezioa 15 eurokoa eta 18koa da federatu eta federatu gabekoentzat, hurrenez hurren. Proban zehar hiru anoa-postu izango dira, bai eta laguntza medikoa eta parte-hartzaileentzako asegurua. Amaitzean, opari-poltsa jasoko dute eta bizikletak garbitzeko aukera egongo da Bañueta kiroldegian.
Informazio gehiago topatu daiteke eguzkierronka.wordpress.com blogean, bai eta sare sozialetan zein desafiosolar@gmail.com helbidera mezu bat bidaliz.