Eskualdeko 12 ikastetxetako irakasleek, gurasoek eta langileek LOMCE legearen aurkako plataforma sortu dute. Aurkezpen ekitaldia larunbatean izango da, hilak 22, 12:00etan Laudioko Lamuza plazan.
Aiaraldeko hezkuntza-komunitateak, beste eskualde eta herri batzuetan abiatutako dinamikari jarraiki, LOMCE Espainiako gobernuaren hezkuntza-lege berriari erantzuna emateko plataforma sortu berri du. Jakitera eman dutenez, urtarrilean hasi ziren erantzun bateratu hori aktibatzeko lanarekin, eta eratu duten “foro irekiak” bi helburu nagusi jorratu nahi ditu: “LOMCE legearen inposaketen aurkako erantzuna aktibatzea eta etorkizunari begira gure herrirako nahi dugun hezkuntza-sistema berriaren eraikuntzarako urratsak ematen hastea”.
12 ikastetxe eta hainbat ekimen
Mahai gainean jarri dituen helburu horiei heltzeko, plataformak hainbat ekimen abian jarriko ditu. Adierazi dutenez, ekimenok “irekiak eta parte hartzaileak” izango dira eta udalerri eta ikastetxe bakoitzean garatuko dira. Guztira Aiaraldeko hamabi ikastetxetako 40 pertsona inguru batu dira plataforman, besteak beste, Laudioko Latiorro eskola, Laudio Ikastola, Laudio Institutua, Udal Lanbide Heziketa Eskola eta Lamuza Eskola, Amurrioko Lucas Rey-Matias Landaburu eskola, Aresketa Ikastola, Zaraobe Institutua, Zabaleko eskola, Orozkoko eskola, Urduñako eskola eta Aiarako Etxaurren Ikastolakoak.
Aurkezpen ekitaldia
Plataformaren aurkezpena martxoaren 22an egingo da eguerdian Laudioko herriko plazan. Berton datozen hilabeteetan abiatuko dituzten bi dinamiken berri emango dute: “LOMCErik gabeko herriak” ekimena eta Hezkuntza Plataformen Topaguneak bultzatuko duen sinadura bilketa. Dei egin diete Aiaraldeko irakasle, guraso eta herritar guztiei aurkezpenera joateko, eta bereziki ikastetxeetako zuzendaritza taldeei eta guraso elkarteei, bai eta udaletako hezkuntza arduradunei eta eragile sozialei.