Bigarren urtez jarraian, Oinkariak Atletismo Taldeak herri-lasterketa antolatu du. Iazko ibilbide berbera izango du eta maila guztietako korrikalarientzat dago pentsatua.
Amurrioko Oinkariak atletismo-taldeak abenduaren 22an egingo du herri-lasterketaren II. edizioa, udalaren eta Tubos Reunidos enpresaren laguntzaz. Iazko arrakastaren ondoren, aurten ere 400 parte-hartzailera mugatu dute inskripzioa, eta iaz bezala umeentzako probak ere egingo dira, denontzako moduko lasterketa polit bat egiteko asmoz. Aurten, diru-kopuru sinboliko bat ordaindu beharko da lasterketa nagusian parte hartzeko, eta diru hori laguntza-taldeari emango zaio. Parte-hartzaileek hornidura eta oparitxoa jasoko dute amaitzean.
7 km-ko ibilbidea
Lasterketak iazko ibilbide bera izango du: Frontoi kaletik abiatuta buelta txiki bat egingo du herrigunetik, ostera ere irteera puntura itzuli eta zirkuitu handiari bi buelta emateko. Guztira 7 km bete beharko dituzte. Lasterketa nagusia 12:00etan hasiko da. Ondoren, 9 eta 15 urte bitartekoen txanda izango da 12:45ean, kilometro bateko zirkuitu batean, eta azkenik, 13:00an, gazteenek 500 m egingo dituzte.
Izena emateko epea, zabalik
Aurten, esan bezala, 5 euro ordaindu beharko dituzte helduek parte hartzeko, eta umeentzat doakoa izango da. Izen-ematea dagoeneko egin daiteke www.kirolprobak.com web gunean abenduaren 20era arte. Umeek lasterketa hasi baino 30 minutu lehenago arte eman dezakete izena.