Urduñako Antzinako Andra Mari ikastetxeak 50 urte betetzen ditu aurten eta zenbaki borobil hori dela eta hainbat ekimen egin dute azken egunotan. Ospakizunei jarraipena emateko, datorren ekainaren 11n bertako ikasle ohiek bilkura egingo dute ikastetxean bertan; bost hamarkadetan zentrutik igaro diren ikasleek topo egiteko parada izango da.
10:00etan ikasleak Ikastetxe aurrean elkartu eta Antiguako Santutegira abiatuko dira, bertan meza izango dute; ondoren, 12:30ak aldera, ikastetxean bisita egin eta argazki zaharrak ikusteko aukera emango diete. Eguerdian bazkaria egin eta bazkaloatean musika emanaldiak egingo dira bertaratuentzat.
Ikasle ohien bilkuran parte hartzeko 94 444 41 55 telefonora deitu behar dute interesdunek edota jon@imaginegrupo.com emailera idatzi.
50 urte Josefinoen etorreratik
1965ko urriaren 5ean hasi ziren Murialdoko Josefinoak Urduñako ikastetxean klaseak ematen; ordurako bi urte zeramatzaten eraikina atontzen Jesuitek bertatik alde egin eta gero.
50. urteurrena ospatzeko hainbat ekintza sustatu dituzte, guztira 4 kirol ekimen, 6 hitzaldi eta beste dozena ekimen kultural izango dira: argazki eta pintura erakusketak, ipuin lehiaketa, kontzertuak, euskal zinemaren asteburua eta abar.