Ekainaren 21a Yogaren Nazioarteko Egun izendatu zuen iaz Nazio Batzuen Erakundeak.
Eguna Espainiar Estatuko hamaika tokitan ospatuko da eta Arabako ospakizuna, hain zuzen, Amurrion izango da.
Egunaren nondik norakoak antolatzeko, Aiaraldeko, Gasteizko eta Aguraingo yogazaleak aritu dira lankidetzan, eta "Yoga Harmoniarako eta Bakerako" lemapean, egitarau oparoa prestatu dute ekainaren 20 eta 21erako. Jarduera guztiak dohainik izango dira, eta jende guztiarentzat.
Antolatzaileen hitzetan, zera erakutsi nahi diete herritar guztiei: yogak onurak dituela gorputzean, adimenean eta ariman, eta osasunari, etikari, errespetuari eta garapen pertsonalari estuki lotuta dagoela.
Ekainaren 20an, bada, larunbatean, Bañueta kiroldegian egingo dituzte jarduera guztiak. Askotariko tailerrak eta hitzaldiak prestatu dituzte —umeei propio zuzendutakoak ere bai— eta yogaren hainbat alderdi eta diziplina ezagutzeko aukera emango dute. Programa goizeko 9:30ean hasi eta arratsaldeko 20:00etan amaituko da. Orduantxe hasiko da Adishakti-ren kontzertua. Bazkaria ere emango dute, 8 eurotan, eta bazkaldu ahal izateko ekainaren 17a baino lehen eman behar da izena Amurrioko Kultur Etxean edo emandalaom@gmail.com helbide elektronikoan.
Iganderako, berriz, praktika ireki bat antolatu dute herriko parkean. Meditazioak, asanak, mandalak eta bestelako gauzak egingo dituzte. Arduradunek adierazi dutenez, aukera ezin hobea da yoga sekula egin ez dutenentzat, diziplina hori bertatik bertara ezagutu ahal izango dute-eta.
Argibide gehiago nahi izanez gero, helbide elektroniko hau erabil dezakezue: mandalaom@gmail
Dena den, Facebook taldea ere sortu dute: "Nazioarteko Yoga Eguna Araban".
Albiste honi atxikita dituzue egitarau zehatzak.