Aurten ere etxera joateko brigada moreak egingo ditu Bagara Nor talde feministak Laudioko Jaietan. Iaz egin zituzten lehenbiziko aldiz, “emakume, bollera eta transak etxeratzeko orduan libre izateko”, eta ildo berean sakonduko dute aurten. “Gure gorputzak antolatzeko espazio bat sortu nahi dugu”, adierazi dute taldeko kideek brigadak aurkezteko plazaratutako oharrean, “argi daukagu kaleak eta gauak gureak direla eta autodefentsa feministaren bidez gureganatuko ditugu”. Kartzeletan dauden emakume presoak ere aipatu dituzte oharrean: “ez gaude denok. Ez dugu erasorik onartuko, ez jaietan ez inoiz ez”.
Gauero
Lamuza Plazatik abiatuko dira brigadak. Gau guztietan egongo dira, azkenekoan -Erroketxu Egunekoan- salbu. Ekimenean parte hartzeko deia luzatu diete Bagara Norreko kideek herriko jaietan egongo diren “emakume, bollera eta transei, kaleak hartzeko, morez margotzeko eta jai seguru batzuk eraikitzeko”.
Azken urteetako bilakaera
Geroz eta pisu gehiago hartzen ari dira eraso sexisten aurkako aldarriak Laudioko Jaietan. 2015eko txupinazoan hainbat adin eta perfiletako emakumeak igo ziren Herriko Plazan zegoen oholtzara, “Erasorik ez erantzunik gabe! Beldurra aldez aldatuko dugu!” zioen pankarta eskuan.
Iazko jaietan egin ziren brigada moreak lehenbiziko aldiz, eta festaren beste hainbat unetan ere egin ziren erasoen aurkako ekintzak, Gabarra jaitsieran kasu.
BRIGADEN ORDUTEGIA
ABUZTUAK 15, ASTEARTEA,TXUPINAZO EGUNA:
1:00etan eta 4:00etan
ABUZTUAK 16, ASTEAZKENA, SAN ROKE EGUNA:
2:00etan eta 5:00etan
ABUZTUAK 17, OSTEGUNA: ATZOKO GAZTEEN EGUNA
23:00etan
ABUZTUAK 23, ASTEAZKENA: BERAKATZ EGUNA
1:00etan
ABUZTUAK 24, OSTEGUNA: KOADRILEN EGUNA
2:00etan eta 5:00etan
ABUZTUAK 25, OSTIRALA: BASERRITAR EGUNA
2:00etan eta 5:00etan
ABUZTUAK 26, LARUNBATA: ODOLOSTE EGUNA
2:00etan eta 5:00etan
Brigada guztiak Lamuza Plazatik abiatuko dira, aipatutako orduetan
