Okondoko udaleko oposizioko kide guztiek - EAJko Jose Angel Eguia, Begoña Rodriguez eta Alberto Muñozek, EH Bilduko Itziar Camino eta Mikel Cuestak eta Amaia Sadaba independenteak- oharra zabaldu dute plazaratzeko administrazioarekiko auzien epaitegiak ez duela aintzat hartu Sergio Tato alkatearen salaketa.
Alkateak eskatu zuen lanaldi osoko soldata berriro izatea, Udal Lege berria baliatuta eta lanaldi osoko ordutegia duela aldarrikatuta. Hala ere, epaileak ez du onartu eskaria, bere ustez, epez kanpo egin baitu. 2 hilabeteren buruan egin behar zuen, baina 5 hilabeteren ostean aurkeztu zuen.
Orain 15 lan egun izango ditu alkateak helegitea jartzeko Euskal Herriko Epaitegi Gorenean.
"Salaketaren muina"
Sergio Tatok adierazi du Epaitegi Gorenera jotzeko asmoa daukala, izan ere, bere aburuz, epailea ez da sartu salaketaren muinean, hau da, ebaztean ea benetan dagokion lanaldi osoko soldata. Okondo Aurrerako ordezkariak nahi du epaileen balorazioa forma-akatsetik harago joatea eta horri buruz erabakitzea.
Alkatearen ustez, epe barruan egin zuen salaketa: "horretarako jakinarazpena aintzat hartu behar da, eta ez akordioaren data".
Bukatzeko, Sergio Tatoren iritziz, oposizioak ez du baloratu nahi bere eskubidea den soldata osoa kobratzea eta nahiago dute forma-akatsean geratzea.
Okondo Aurrera taldeak Sergio Tato babestu du. "Okondokoa izango da seguru aski lanaldi osoan lan eginda soldata erdia jasotzen duen Euskal Herriko alkate bakarra", adierazi du taldeak.
"Harropuzkeria", oposizioaren ustetan
Oposizioko kideek leporatu diote alkateari modu harroputzean jokatzea eta akordioak lortzeko borondaterik ez izatea.
Gainera, adierazi dute Sergio Tatok 300 euroko kostak ordaindu beharko dituela. Bestalde, nabarmendu dute epaiketaren gainerako gastuak udalak bere gain hartu dituela, eta helegitea onartuko balute udalak kostu gehiago izango lituzkeela.
