ASASAM elkartea ekonomikoki laguntzeko bazkari solidarioa antolatuko dute datorren martxoaren 27an, Kexaako Arcos de Quejana jatetxeko 'Ametsen Hariztian'. Bazkariak 60 euroko prezioa izango du eta lortutako dirua elkartea finantzatzeko baliatuko da.
Izen emateko nahikoa izango da 944034690 edo 946726446 telefonoetara deitu eta erreserba egitearekin. Nahiago duenak mezu elektronikoa bidali dezake ere info@asasam.org helbide elektronikora.
Kexaako hitzordura bertaratzerik izango ez dutenei ere zabalduko diete ASASAM elkartea laguntzeko aukera. Horretarako, menua erosteko aukera jarri dute, bertaratu ez arren, bai eta diru ekarpenak kontu korrontean egiteko aukera ere. Hau da ekarpenak egiteko kontua: ES25 3035 0045 27 0450018196.
Hariztira bisita
Bazkariaren aurretik 'Ametsen Hariztia' bisitatuko dute. 2021eko ekainean inauguratutako eta Arcos de Quejana jatetxeak sustatutako proiektua da. 25 artistek margotutako 25 haritzek osatzen dute espazioa, eta margotutako zuhaitz bakoitza gobernuz kanpoko erakunde edota fundazio batekin lotu da.
Hain zuzen ere, buru osasun arazoak dituzten pertsonen eta senideen Aiaraldeko elkarteari eskaini zion Jose Abel artistak hariztian margotu zuen zuhaitza. Lastargia eta bosgarren elementua da obra horren izena.