Bukatu dituzte Maroñoko urtegiaren urbazterreko ingurunea egokitzeko eta lehengoratzeko obrak, Arabako Foru Aldundiaren eta Eusko Jaurlaritzaren eskutik.
Alde batetik, hondakinak eta isurketak kendu dituzte urtegiaren hegoaldean, eta saneamendu tratamendua egin dute. Horretarako, urbazterrak egokitu eta lehengoratu dira, gainazal osoa garbituz, inausiz eta sastrakak kenduz. Gainera, urbazterreko landaredia eta bertako zuhaixkak lehengoratu eta sartu dira, ur ertzetako zerrendetako iragazki berde izan daitezen. Babes itxitura perimetral batek osatu du esku hartzea.
Bestalde, begiratokiko obrekin lurzorua saneatu dute, behaketa puntua eraginkorragoa izan dadin. Oinezkoentzako bidean, bide zorua zaharberritu eta baranda eta pasabidea jarri dituzte. Bidezidorraren inguruan, bestalde, garbiketa eta sastrakak kentzeko lanak egikaritu dituzte, bai eta Letobarri parkeko landareztatutako inguruneari jarraipena eman ere, bertako espezieen landaketekin. Egindako esku hartzearen helburua da ingurune horren guztiaren paisaia baldintzak hobetzea.
Aiaraldeko Berehalako Jarduketa Planaren parte dira bi ekintza horiek, A8 proiektu eragilearen esparruan (Ingurumena eta mugikortasun jasangarria), eta Foru Aldundiak eta Eusko Jaurlaritzak finantzatzen dituzte, lankidetza hitzarmena sinatu baitzuten 2022. urtearen amaieran.