Nafarroako hegoaldeko euskalgintza suspertzeko Errigora ekimenak udazkeneko kanpaina berria abiatu berri. Eremu horretako propio diren produktuez osatutako otzarak salgai jarri dituzte 50 eurotan, salmentan bildutako diruaren %25a Lodosa eta Vianako ikastolen biziraupenera, Erriberako AEKra eta D eredua Nafarroa osoan hedatzeko ekimenetara zuzenduko du Errigorak.
Saltokiak
Hainbat salmenta puntu izango dira Aiaraldean: Txoko gorri elkarte Amurrion, Berbots euskaltegia (AEK), Laudio Ikastola eta Institutua, Arrañope taberna, Baratze elkartea, JEZ enpresa eta Eska Hyundai tailerra Laudion, Etxaurren Herri eskola eta Meson Okondo jatetxean Okondon, Gure arraindegia denda Orozkon eta Herri eskola eta Mugalde elkartea Urduñan. Honez gain internet bidez kontakta daiteke ekimenarekin www.errigora.eus helbidearen bidez, otzarak erosteko zein salmenta puntuak proposatzeko.
Auzolanaren arrakasta
Euskal Herriko 15.000 etxetan egin dute bat Errigora ekimenarekin 2013az geroztik, sortu den 1,5 milioi euroko fluxu ekonomikotik 300.000 euro bideratuz Nafarroa hegoaldeko euskalgintzara 3 urteko ibilbide horretan. 370.000 kontserba ontzi eta 88.000 litro olio banatu dira orotara Errigorak urtaro ezberdinetan bolondresen ekimenez eta Sortzen, AEK, Zazpiak Bat, Ikastolen Elkartearen babesaz zabaldutako kanpaina ezberdinetan.
15 nafar ekoizle batu dira aurten ekimenera beraien produktuak otzaratan eskaintzeko: Ardo beltz botila (Azpea, Lezaun edo Mendiko), litro erdiko oliba olio birjina estra botila (Bardea, Castillo de Ablitas, Ekolo edo La casa del aceite), melokotoia almibarrean (Almanaque), orburuak (Ebron edo Maria Jesus), potxak (La Churta edo Maria Jesus), kardua (Maria Jesus edo Pedro Luis), mahats zukua (Ekolo), almendrak (Ntra. Sra. Del Rosario), pikillo piper ontzi txikia (Iturri), pikillo piper ontzi handia (El Escolar edo Meleta), zainzuriak (Iturri), melokotoi marmelada (Pedro Luis) eta pikillo piper untapana (Almanaque).
[video:https://www.youtube.com/watch?v=QKS3Gh0HKg8]