Arabako Foru Aldundiak 50 urte baino historia luzeagoa duten herrialdeko hamar futbol talde amateurrei emango die Arabako Domina, beraien artean, Amurrio eta Laudio futbol taldeak.
Gasteizko 6 talde, Amurrio, Laudio, Agurain eta Langraitz-Okakoekin batera Artium museoan bilduko dira apirilaren 28an Arabako Domina jasotzeko.
Arabako diputatu nagusiak, Javier de Andresesk iragarri zuen asteartean Arabako Domina jasoko dutenen zerrenda. “Bost hamarkada luzetan, gure lurraldeko hamar futbol taldek lan itzela egin dute, eta lan horren bidez hainbat balio irakatsi dituzte, hala nola, ahalegina, elkartasuna eta konpromisoa, bai eta, halaber, kirolarekiko zaletasuna sustatu ere. Tarte horretan, Arabako kirola sustatzen lagundu dute, hala oinarrizkoa nola profesionala, eta horrela, Araba izena lehiatu diren tokietara eraman dute” adierazi du.
Domina jasoko duten hamar taldeetan Gasteizko 6 talde: Alipendi (1926), Aurrera (1935), Vitoria (1945), Abetxuko (1962), San Ignacio (1964) eta Racing de Santo Domingo (1964) eta Agurain (1964), Langraitz-Oka (1960), Amurrio (1949) eta Laudioko (1927) taldeak daude.
Aldundiak taldeek berrogeita hamar urte horietan etengabe lanean jardun izana goraipatu nahi izan du Domina ematean, guztien artean 2.300dik gorako kirolari lizentzia biltzen dituztela azpimarratu du taldeen bizitasun eta zolitasun horren adierazle bezala.