Bihar argitaratuko da Aiaraldea Hemen hamabostekariaren zenbaki berria. 69. zenbakia izango da, baina bigarrena diseinu eta eduki planteamendu berrira salto egin zenetik.
Hainbat gai jorratuko ditu hamabostekariak. Lau orriko erreportaje sakona egongo da eskola jantokien inguruan. Beste artikulu mamitsu bat ere izango du hamabostekariak, Arrankudiaga-Zollon Guda Zibilean jazotako bonbardaketen ingurukoa. Auzokideen zuzeneko bizipenak entzuteko parada izango du irakurleak.
Umeen txokoa
Elkarrizketak, gaurkotasunari lotutako albisteak eta beste hainbat eduki topatu ahal izango dira baita hamabostekariko orrietan. Ez da faltako ezta haurrei zuzendutako AiaraldeaTxiki gehigarria, hainbat joko hezitzailez osatutakoa. Baina egunkaria ez da ohiko 24 orritara mugatuko. Beste zortzi gehituko zaizkio, eskualdeko txakolin uztaren inguruko gehigarri berezia izango duelako.
Bihar eguerdian iritsiko dira hamabostekariaren aleak eskualdera, eta jarraian ekingo diote Aiaraldea hedabideko kideek banaketa egiteari.