Errigorako kideek oso positiboki baloratu dute aurtengo uztak izandako harrera. Izan ere, inoizko banaketarik arrakastatsuena egin dute. 10.000 etxetara iritsi dira, iaz baino %20 gehiago. 143.000 litro olio banatu dituzte, iaz baino %35 gehiago, eta 271.000 konserba ontzi eta 41.000 arroz eta pasta pakete banatu dituzte, %15 gehiago.
Aiaraldea ez da salbuespena izan. Euskara eta lehen sektorea uztartzen dituen ekimenak 534 olio litro, 407 kontserba ontzi eta 35 arroz eta pasta pakete banatu ditu eskualdean.
Grafiko honetan ikusi daiteke Aiaraldeko banaketaren azken hiru urteetako bilakaera:
Euskara eta nekazaritza ekologikoa, elkarlanean
"Ekimen herrikoi" gisa definitzen du Errigorak bere burua. Nafarroako hegoaldea du ardatz, eta euskara ofiziala ez den guneetan eragitea du helburu, "lan komunala" ardatz hartuta. Tokiko ekoizleekin elkarlanean aritzen dira, euren produktuak Euskal Herri osoan zehar banatuz, eta lortutako diruaren zati bat bideratzen dute euskararen normalizazioaren aldeko proiektuak finantzatzera. Modu horretan, tokiko nekazaritza ekologikoa eta euskara elikatzen dituzte aldi berean.
Bi kanpaina egiten dituzte urtero. Orain amaitu dutena 'Nafar hedoaldeko uzta eskutik eskura' da. Udazkenean, aldiz, 'Nafar hegoaldeko uzta euskarari puzka' egitasmoa antolatuko dute. 2013an abiatu zuten kanpaina hori. Tokiko produktuekin osatutako saskiak atontzen dituzte auzolanean, eta horiek salmentatik lortzen duten diruaren %25 doa euskararen aldeko mugimendura.