Iruñeko Geltoki espazioan egin zuten agerraldia atzo Errigorako eta Euskaltzaleen Topaguneko kideek. Alde batetik, Errigoraren azken kanpainaren datuak eman zituzten eta, bestetik, ostiralean hasiko den Euskaraldian parte hartzeko deia zabaldu zuten.
Errigorako datuei dagokienez, zifra bikainak aipatu zituzten: “200.000 euro gehiago izango dira Lodosa, Tutera eta Bianako ikastoletan, Ager osoko AEK-ren euskaltegietan bekak banatzeko, eskoletan D ereduko lerroak bultzatzeko eta Agerraldia egitasmoaren baitan urte guztirako agenda zabala osatzeko”.
Bat egiteko garaia da izan du goiburu aurtengo kanpainak. Horren bitartez “euskarak lurraldean mugarik ez izateko eta nafar guztiek eskubide berdinak izateko aldarria” hedatu dute.
Urtero legez, auzolana izan da kanpaina osoaren gakoa, bai antolaketan, kudeaketan, biltegiratzean zein banaketan. “Urrian, Ablitas eta Tuteratik Euskal Herriak bat egiteko luzatutako deiak erantzun bikaina izan du beste behin. Euskarari, elikadura burujabetzari eta auzolanari bultzaka darrai Errigorak, txikitik handira, modu praktikoan”, azaldu zuten boluntarioek atzoko agerraldian.
Orotara 13.000 saski banatuko dituzte datozen asteotan. Horietatik, gutxienez 195 banatuko dira Aiaraldean, datu osoen faltan.
Kanpainari oihartzuna emateko, Aiaraldea Komunikabideak hiru saski zozkatu ditu, mota bakoitzeko bana. Uztai Largatxa, Unai Salabarria eta Kepa Zaballa izan dira irabazleak.
Kanpaina batetik bestera
Ostiral honetan bertan, azaroaren 18an, Euskaraldiaren III. edizioa abiatuko da. Iruñeko agerraldian, Euskaltzaleen Topaguneko kideek ekimenean parte hartzeko eta 15 egunetan erronkari eusteko deia luzatu zuten, oraindik ere izena emateko parada dagoela gogoraraztearekin batera. “Mugimendu handia sumatzen da, eta urteek ematen duten esperientzia ere nabari da ariketa azaltzeko eta ulertzeko sakontasunean”, adierazi zuten bozeramaileek.
Besteak beste, ariketak iraun bitartean erronkari eusteko animoak zabaldu zituzten. Era berean, ariketari ikusgarritasuna emateko, Euskaraldiaren banderatxoak jartzeko eta txapa beti soinean eramateko deia luzatu zuten, baita sare sozialetan honen berri emateko.