Amurrioko EH Bilduk azaldu duenez, zuzenketak eztabaidatzeko bileraren ondorio da berri ona: 19 proposamen sartzea lortzea, hain zuzen. Gazteentzako Enplegu Plana egiteko partida da proiekturik handiena, 50.800 eurokoa. Iñaki Ibarluzea eledunaren arabera lehentasuna da herriarentzako: "Langabezian dauden gazte kopurua handitu egin da eta ez dute Amurrion bizitza-proiektuak egiteko aukerarik". Horrez gain, Administrazio juntei egiten zaien ekarpena handitzea onartu dute, eta Aresketamendi parkearen mantenura partida bideratzea. Bestalde, 13.000 euro gehiago izango dituzte gizarte-laguntzetarako eta beste lerro bat sortuko da Tiipi-Ttapa haurreskolan plaza gehiago sortzeko.
Kultura eta euskara arloetan ere jarri dute arreta. Hala, 5.000€ onartu dira Begibistan festibalarentzat, 2.000€ Aztarnarentzat eta 5.000€ museo etnografikoa finantzatzeko. "Hiru proposamen hauek Guk Biarekin batera egin dira", zehaztu du. Euskara sustatzeko, aldiz, hizkuntza ikasteko bekak areagotuko dira.
"Eztabaidan zehar, zenbait zuzenketa kendu ditugu aurrekontuetan jasota zeudelako, beste talde batzuek tramitatuta zeudelako, edo Gobernu Taleak berak proposamenak aurrera ateratzeko konpromisoa hartu duelako", erantsi du Ibarluzeak. Horien artean daude San Mames Etxea etxebizitza komunitarioa konpontzeko 20.000€, Etxegoienbide kalearen konponketa, frontoiko leihoetan biniloak jartzea edo San Pedro mendian memoria historikoa berreskuratzeko lanekin jarraitzea.
Baztertutako proposamenak
Badira, ordea, onartu ez diren ekarpenak: "Amurrio Bidean Reforren sustapen ekonomikorako partida, Burubio elkarterantzako laguntza handitzea, umeentzako igerilekuen ondoan komuna jartzea eta gasolindegia deskontaminiatzea, kasu.
Prentsa oharrean adierazi dutenez,EH Bildu Amurrioko kideak pozik azaldu dira lortutako emaitzekin: "Gobernu taldeak proposatutako aurrekontuetan antzemandako gabeziak zuzentzeko asmoz lan egin dugu, eta EH Bildu konprometitua dagoen lan lerroetan aurrera egiteko".