Zer iritzi duzu azken asteetako lehen sektoreko mobilizazioen inguruan? Bat egiten duzu?
Nik protestak ondo ikusten ditut. Nik beti protestatu du, eta batu izan naiz mobilizazioetara; baina ez orain bakarrik, betidanik. Beti aldarrikatu izan dut burokrazia gehiegi pairatzen dugula, ulertzen dut kontrolatu behar gaituztela baina izugarria da bete beharreko paper kopurua. Are tristeagoa da ikusten duzunean ekoizle handiekin hain zorrotzak ez direla. Guztioi berdin tratatu beharko gintuzkete. Oso bidegabea iruditzen zait egoera.
Zer behar dituzue tokiko ekoizleek?
Pandemiaz geroztik eta azken urteetako gerren ondorioz, erregaiak, argindarrak… denak egin du gora, eta guk, ezinbestean produktuen prezioak igo behar izan ditugu. Lehengaien prezioak erregulatu beharko lituzkete, guk gehiegizko kostu hori bezeroaren gain ez kargatzeko.
Salmenta zuzena baliatzen duzu zure produktuak saltzeko. Zer balio ematen diozu horri?
Nik gazta gehienak salmenta-zuzenaren bidez saltzen ditut, Amurriokoa da postua jartzen dudan azoka bakarra eta gainerakoa lau saltoki txikitan uzten dut.
Salmenta-zuzenak ekoizle eta bezeroaren arteko harreman estua sortzen du. Bezeroak bertatik bertara ezagutu dezake, kasu honetan gaztaren ekoizpen prozesua nolakoa izan den, eta edozein zalantza argitu.