Rock jaialdiak, kirolak, danborradak eta herri-gastronomia izango dira Aiara eta Laudio udalerrietan San Prudentzio egunaren inguruan prestatu dituzten jai egitarauen ardatzak.
Aiara udalerriko zaindariaren jaiak apirilaren 27tik 29a bitartean ospatuko dituzte, Laudioko programak berriz, atariko eta ondorengo asteburuetan ere ekintzak eskainiko ditu, berton jokatzen diren bola joko mota ezberdin guztiek tokia izan dezaten.
Udalerri bietako jai egitarau zehatza http://www.aiaraldea.com/agenda estekan bistara daiteke.
Aiaran, Herri kirola eta rock-folk jaialdia
San Prudentzio egunean, apirilaren 28an, pisuzko ekintza bi antolatuko dituzte Aiaran. Udalerria osatzen duten herri guztiei herri kirol lehiaketan parte hartzeko gonbitea luzatu zaie. 17:30etik aurrera herri bakoitzeko 4 neska eta 4 mutilez osatuko diren taldeak, lasto altxatzean, jende proban, aizkorarekin, trontzarekin, ingudearekin eta lokotxekin, besteak beste, lehiatuko dira.
Odoloste jana herrikoia ostean, 21:30ean, I. Aiara folk-rock jaialdiari emango diote hasiera. Programa, ordubeteko tartearen hurrenkeran, Joy Of Convolution, Dagreim, Goaz eta Laramie taldeek osatuko dute; ordu txikitako 01:30etik aurrera diskodantza eta 03:30etik aurrera DJ Agila ere jaialdi barnean dira.
Laudion, danborradak eta barraskiloak
San Prudentzio bezperan, ostiralean, eta ondorengo egunean, igandean, kokatuko dira Laudion egingo diren ospakizun nagusiak. Apirilaren 27an haur eta nagusien danborradak ospatuko dira. 17:15etik aurrera, Lamuza, Latiorro, La Milagrosa eta Ikastolako ikasleek, Donostiako Santo Tomas Lizeoko ikasleak lagun, jai giroa zabalduko dute Herriko Plazatik abiatzean. Helduen txanda Rakatapla elkartean eskutik hasiko da 20:00etan Kultura Etxetik abiatuta eta 22:00etan Erretreta joko dute Herriko Plazan.
Igandean, apirilaren 29an, Rakatapla elkartearen antolakuntzapean, Barraskiloak saltsan prestatzeko XX. gastronomia lehiaketa ospatuko da 09:00etatik aurrera Herriko Plazan eta 12:30etan dastatzeko eskainiko dituzte ere.