“Euskal memoria, gerra zibila eta frankismoa” hitzaldia eskainiko dute Iñaki Egañak eta Joxean Agirrek, Euskal Memoria Fundazioko kideek, martxoaren 9an, ostiralean, arratsaldeko 19:30ean, Laudion, Herriko Plazako erabilera anitzeko gelan. Frankismoak Euskal Herrian eta Aiara eskualdean utzitako arrastoa argitara ekarriko dute, besteak beste.
Hitzaldia Laudion Gerra Zibilaren inguruko ikerketa urte hasieran abian jarri zuen taldearekin batera jorratuko dute. Talde horretako kide batek, Laudion gerra garaiko eta osteko urteei buruzko informazioa, testigantzak eta dokumentazioa herritarren artean biltzeko ekimenak izandako lehen emaitzen berri emango du, bai eta aurrera begirako egitasmoak aurkeztuko.
Iñaki Egaña idazle eta historialari donostiarrak “Frankismoa Euskal Herrian” liburua argitaratu berri du 2011 amaieran. Euskal Memoria Fundazioko lehendakaria da eta Aranzadi Elkartearekin elkarlanean “1936. Gerra Zibila Euskal Herrian” bildumaren koordinatzailea da.
Joxean Agirre soziologo donostiarra, Giza Eskubideen aldeko herri mugimenduko kide eta Euskal Memoria Fundazioaren sortzaileetako bat da. 2010ean Fundazioak kaleratutako “Gernikako seme-alabak” lan kolektiboa koordinatu zuen.