“Kupidoren gezi galduak” komedia eskainiko du igandean Ugaoko Bidea taldeak Lanbide Heziketa Udal Ikastetxean arratsaldeko 17:30ean. Aiaraldean kokatutako hainbat eleberrien egileak, Jose Luis Urrutia idazle eta gidoigileak idatzitako antzezlana, irailaren 4an estreinatu zuten ugaotarrek Portugaleten.
Ezusteko ekaitzak harrapatuta, landetxe batean babes bila asteburu batez elkartutako pertsona taldearen gorabeherak kontatzen ditu komediak. Berton bildutako bikoteetako kideen arteko antzinako amodio-kontuek, korapilo barregarriak eragingo dituzte aspaldiko sentimenduek sortutako harreman berriak kolokan jartzean.
Herri ekimenaz sortutako taldea
2010ean Ugaoko udalak hiribildua sortu zeneko 635. urteurrena ospatzeko “Miraballes hiriberriaren sorrera” obraren antzezpena antolatu zuen. Xede horrekin jyt kreaKtibos produkzio-etxeak ugaotarren artean egindako gonbiteak izandako arrakastaren ondorioz sortutako taldea da Ugaoko Bidea.
Bi urteren bueltan kaleko antzerkia, laburmetraiak zein antzezpen historiko ezberdinetan hartu dute parte. Ez da taldeko partaideek Laudion egingo duten lehen agerraldia, uda partean Beldui txakilendegiak eskainitako afariak girotu dituzte aurten. Igandean Laudion eskainiko duten lanaz gain, arazo sozialekin lotutako antzezpen laburrak eta iraila aldera Ugaoko jaietan estreinatu behar duten obra berria prestatzen ari dira.