Laudioko merkatari eta ostalarien elkarteak, APILLek, Laudioko 2. Argazki Txapelketako sari banaketa burutu zuen ostegunean gastronomia museoan.
Amaia Yanizek eskuratu zuen lehen saria “Pórtico” argazkiarekin. Luis Candidoren “La mirada mágica” izan zen bigarren sariduna, eta hirugarrena Jabier Ordriozolaren “Begirada” lana. Antolatzaileen esanetan “epaimahaiak ez zuen lan erraza irabazleak aukeratzerakoan, jaso diren lanen kalitatea apartekoa izan da”.
Lehen 3 saridunek 500, 250 eta 100 euroz kargatutako TCA txartelak, APILLek Laudioko dendatan ordaintzeko bultzatutako kreditu txartelak, eskuratu zituzten.
2012ko egutegia
Guztira 13 argazki aukeratu ditu epaimahaiak APILLek 2012rako argitaratu behar duen “Laudio, merkataritza eta aisia” egutegiaren azala eta 12 hilabeteak osatzeko.
Laudioarren partaidetza bultzatuko du APILLek eta egutegirako aukeratutako argazki guztien arteko bozketa egitea proposatuko die. Herritarrek aukeratutako argazkiaren egileak 150 euroko TCA txartela eskuratuko du eta bozketan parte hartzen duten laudioar guztien artean 100 eta 50 eroko erosketa txartelak zozketatuko ditu APILLek.