Tubos Reunidos Taldeak 2011ko iraila bitarteko tartean 18,3 milioi eurotako irabaziak aitortu ditu, 2010 urtean lortutako 3,3 milioi euroekin alderatuta, ia seikoiztu ditu Amurrioko enpresak bere irabaziak. Negozio-kopuruari erreparatuz gero, %44ko igoera aitortzen du enpresak.
EBITDAk (ingelerazko Earnings Before Interest, Taxes, Depreciation, and Amortization), Interes, Zerga, Balio-galera eta Amortizazioen Aurreko Irabazien finantza-adierazleak, %76an egin du gora urteko lehen bederatzi hilabeteetan. Adierazle honen gorakada, gastu kontrolerako bideratutako plan zorrotzak eta Estrategia Planean aurreikusitako inbertsio asmo handiek ahalbidetu dute, enpresaren esanetan. 2010eko maiatza bitartean, Enplegu Erregulazio Espediente bi bideratu ditu Amurrioko faktorian.
Enpresa taldearen ekoizpen asmoei dagokienez, 2011-2014 aldirako plan estrategikoak hodien negozioa lehenesten du, balio erantsi handiagoa sortzen duten hodietan espezializatzeko bidea indartuz. Honek taldearen gainerako filialen etorkizunean eragin zuzena izan dezake. Egun egoitza nagusia Bartzelonan duen Almesa logistika enpresaren salmenta prestatzeko prozesua zabalik dago. Amurrioko Inauxa enpresarako antzeko asmoak iragarri dira 2011an zehar baina ez dira, antza, bideratu. TR talde barruan Iruñeako Acecsa, Lantarongo TR-Lentz, Trapagarango Productos Tubulares eta Cadizeko Trandsa enpresak kokatzen dira.