Laudio, Orozko, Urduña eta Amurrioko gazteek abendurako egitarau oparoa antolatu dute.
Laudioko gaztetxean, abenduaren 13an, 20:30etatik aurrera pintxopotea izango da, ostegunero legez; bien bitartean otsoaren hatsa filmearen proiekzioa eta, Laudioko Memoriako kideen eskutik, “Gerra Zibila Laudion” deituriko hitzaldia egongo dira.
Abenduaren 20an, 20:30etatik aurrera pintxopotearekin batera monologoaz gozatzeko aukera edukiko dute bertaratutakoek. Hilaren 24 eta 31an, ospakizunetan murgiltzeko musika emanaldi bana; 0:30etatik aurrera Txapis Sound System eta DJ Fun igoko dira oholtzara, hurrenez hurren.
Tartean, abenduaren 27an, 20:30etatik aurrera pintxopotea eta Gartxot pelikularen proiekzioa eskainiko dira.
Orozkoko kultur etxean Gazte Asanbladak antolaturiko frakcking-aren inguruko hitzaldia emango da abenduaren 14an, 18:30etatik aurrera. Urduñan, bestalde, bertsolariak izango ditugu hilaren 28an, 20:30etatik aurrera, Gaztetxean. Bertso saioan Ane Labaka, Ander Solozabal, Maddi Gallastegi, Ainhoa Comas, Jone Uria eta Jokin Uranga arituko dira.
Bukatzeko, Amurrion, abenduaren 14an 17:00etan “To shot an elephant” dokumentalaren proiekzioa egingo da kultur etxean; ondoren Palestinar herriko borrokaren inguruko mahai-ingurua.
Abenduaren 20an, berriz, 18:00etan kontsumismoaren aurkako tailerrak egingo dira, kultur etxean.
Elkartasun egitaraua Laudion
Aipatutakoez aparte, Laudion Elkartasun egitaraua osatu da. Abenduaren 14an, 19:30etan, Udal Lanbide Heziketa Eskolan, “Barrura begiratzeko leihoak” proiektatuko da.
Hilaren 22an, berriz, urtetan Frantzian espetxeratuta egon den Aitor Kortazarri ongi etorria egingo zaio.
Abenduaren 24an, Olentzero eta Maridomingiren bisitarekin batera, preso eta iheslarien aldeko elkarretaratzea egingo da herriko plazan. Abenduaren 28an, aldiz, ohikoa den azken ostiraleko kontzentrazioa egingo da Zuentzat ondoan. Urtea bukatzeko, urtero legez, preso eta iheslarien aldeko brindisa izango da herriko plazan.