Pasa den ostegunean, hilaren 4an, langileek erreferendumean bozkatuta, onartu zuten Tubos Reunidosen proposatutako lan hitzarmen berria. Sindikatu denek ontzat eman duten arren, LAB izan da hitzarmena bere osotasunean sinatu ez duen bakarra.
Hamar greba jardunaldiren ostean heldu dira adostasunera. Akordioan lan erreformaren aurreko babesa ezartzen da; beste batzuen artean, klausula berri batekin, langileek, hitzartutako soldataren azpiko irabaziak izatea saihestuko da.
Honekin batera, ultra aktibitatea bermatuko duen klausula onartu da, hitzarmen berri baten negoziaketetan honetan adostutako kondizioak manten daitezen. Gainera, urte sabatiko bat izateko eszedentzia aukera ere barne hartzen du hitzarmenak, betiere, aurretik, lau urte luzez, lan orduen %100etan lan egin bada. Bost urte hauetan, soldataren %80a kobratuko lukete langileek.
Aipatutakoez gain, errelebo kontratuaren mantentzea, 2012rako soldaten hazkuntza KPI gehi puntu baten eta hurrengo lau urtetan KPI gehi 0,8 puntutan, autofinantziaketa… izan dira lan hitzarmen honen oinarriak.
LABek ez du hitzarmena bere osotasunean sinatu.
Lehenago aipatu bezala, sindikatu abertzaleak, lan hitzarmena ontzat hartu arren, ez du sinatu, iragarritako prozesua errespetatu ez delako. Esate baterako, galdeketa batzar informatiboak deitu gabe egin zen. Gainera, negoziaketak bloke guztien inguruan (euskara, berdintasun plana…) ez direla egin esan du LABek.
Hala ere, langileek lortutako puntuak sinatu eta babestu ditu, gainontzekoetan abstentzioa aurkeztu badu ere.